ଭୁବନେଶ୍ୱର, ଓଡ଼ିଶା ପୋଲିସ ବିଭାଗରେ ମାନବ ସମ୍ବଳର ଅଭାବ ରହିଥିବା କହିଛନ୍ତି ପୋଲିସ ମହାନିର୍ଦ୍ଦେଶକ (ଡିଜିପି) ୱାଇ. ବି. ଖୁରାନିଆ। ବର୍ତ୍ତମାନ ରାଜ୍ୟ ପୋଲିସ ବିଭାଗରେ ପ୍ରାୟ ୨୬ ହଜାର ପଦବୀ ଖାଲି ପଡ଼ିଥିବା ସେ ସୂଚନା ଦେଇଛନ୍ତି।
ଡିଜିପି କହିଛନ୍ତି ଯେ, ରାଜ୍ୟର ବୃଦ୍ଧିଶୀଳ ଜନସଂଖ୍ୟା ଅନୁସାରେ ପୋଲିସ ବଳର ସଂଖ୍ୟା ପର୍ଯ୍ୟାପ୍ତ ନାହିଁ। ଅନ୍ୟ ରାଜ୍ୟ ତୁଳନାରେ ମଧ୍ୟ ଓଡ଼ିଶାରେ ପୋଲିସ ମାନବ ସମ୍ବଳ କମ୍ ରହିଥିବା ସେ କହିଛନ୍ତି।
ସେ କହିଛନ୍ତି ଯେ, ପୋଲିସ ବିଭାଗକୁ ଆହୁରି ସୁଦୃଢ଼ କରିବା ପାଇଁ ସରକାର ପଦକ୍ଷେପ ନେଇଛନ୍ତି। ଏହା ମଧ୍ୟରେ ମୁଖ୍ୟମନ୍ତ୍ରୀ ୧୭ ହଜାର ନୂଆ ପଦବୀ ସୃଷ୍ଟିକୁ ଅନୁମୋଦନ କରିଛନ୍ତି। ନୂତନ ସୃଷ୍ଟି ହୋଇଥିବା ପଦବୀ ଏବଂ ପୂର୍ବରୁ ଖାଲି ଥିବା ପଦବୀକୁ ମିଶାଇ ପ୍ରାୟ ୨୬ ହଜାର ପଦବୀ ପୂରଣ କରାଯିବ।
ଡିଜିପି ଆଶା ପ୍ରକାଶ କରିଛନ୍ତି ଯେ, ଖୁବଶୀଘ୍ର ନିଯୁକ୍ତି ପ୍ରକ୍ରିୟା ଆରମ୍ଭ ହେବ ଏବଂ ସମସ୍ତ ଖାଲି ପଦବୀ ପୂରଣ କରାଯିବ। ଏହା ଦ୍ୱାରା ରାଜ୍ୟର ଆଇନଶୃଙ୍ଖଳା ବ୍ୟବସ୍ଥା ଆହୁରି ମଜବୁତ ହେବ ଏବଂ ପୋଲିସ କର୍ମଚାରୀଙ୍କ ଉପରେ ଥିବା କାର୍ଯ୍ୟଭାର ମଧ୍ୟ କମିବ।
ଏହି ଅବସରରେ ଡିଜିପି ଇନ୍ସପେକ୍ଟର ବ୍ୟୁଟି ମହାନ୍ତିଙ୍କ ମୃତ୍ୟୁ ମାମଲାର ତଦନ୍ତ ସମ୍ପର୍କରେ ମଧ୍ୟ ସୂଚନା ଦେଇଛନ୍ତି। ସେ କହିଛନ୍ତି ଯେ, ମାମଲାର ତଦନ୍ତ ଜାରି ରହିଛି। ତଦନ୍ତ ରିପୋର୍ଟ ମିଳିବା ପରେ ତାହା ଅନୁଯାୟୀ ଆବଶ୍ୟକ ପଦକ୍ଷେପ ନିଆଯିବ।
ଆଇପିଏସ୍ ଅଧିକାରୀ ଜଗମୋହନ ମୀନାଙ୍କ ଇସ୍ତଫା ସମ୍ପର୍କରେ ମଧ୍ୟ ଡିଜିପି ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, ଇସ୍ତଫା ଦେବା ତାଙ୍କର ବ୍ୟକ୍ତିଗତ ନିଷ୍ପତ୍ତି। ଏହାକୁ ଗ୍ରହଣ କରିବା ପାଇଁ ସେ ଅନେକ ଥର ଅନୁରୋଧ କରିଥିବା ଡିଜିପି କହିଛନ୍ତି।
ପୋଲିସ ବିଭାଗରେ ମାନବ ସମ୍ବଳ ବୃଦ୍ଧି ଏବଂ ଆଧୁନିକୀକରଣ ମାଧ୍ୟମରେ ରାଜ୍ୟରେ ଆଇନଶୃଙ୍ଖଳା ବ୍ୟବସ୍ଥାକୁ ଆହୁରି ପ୍ରଭାବଶାଳୀ କରିବା ଉପରେ ସରକାର ଗୁରୁତ୍ୱ ଦେଉଛନ୍ତି।
About the Author
