ଅମାନିଆଙ୍କ ପାଇଁ ସଟ ଡାଉନ ନିୟମ କଡ଼ାକଡ଼ି କଲା ଉପଖଣ୍ଡ ପ୍ରଶାସନ

ଭଞ୍ଜନଗର, ଜୟକୃଷ୍ଣ ପଟ୍ଟନାୟକ – କୋଭିଡ-୧୯ର ମୁକାବିଲା ପାଇଁ ଗଞ୍ଜାମ ଜିଲ୍ଲାରେ ସଟ ଡାଉନ ଘୋଷଣା କରାଯାଇଥିଲେ ମଧ୍ୟ ଏହାକୁ ଅମାନିଆ ମାନେ ମାନିବାକୁ ନାରାଜ।ପୋଲିସ ତରଫରୁ ବାଇକ ଚଳାଚଳ ଉପରେ କଟକଣା ଲଗାଯାଇଥିଲା ବେଳେ ବିନା କାରଣରେ ଲୋକମାନେ ସାଇକେଲ ଓ ଚାଲି ଚାଲି ବୁଲୁଥିବା ଦେଖାଯାଇଛି।ଏହି ସଟଡାଉନ ସମୟରେ ଘରେ ରହିବାକୁ ନିର୍ଦ୍ଦେଶ ଥିଲାବେଳେ ବହୁ ଲୋକ ସକାଳେ ଓ ସନ୍ଧ୍ୟାରେ ଅନାୟାସରେ ଚଳପ୍ରଚଳ ହେଉଛନ୍ତି।ଏହାକୁ ଦୃଷ୍ଟିରେ ରଖି ଭଞ୍ଜନଗର ଉପଜିଲ୍ଲାପାଳ ରାଜେନ୍ଦ୍ର ମିଞ୍ଜଙ୍କ ନିର୍ଦ୍ଦେଶରେ ଆଜି ସହରର ପ୍ରମୁଖ ୪ଟି ପ୍ରବେଶ ପଥରେ ବ୍ୟାରିକେଡ ନିର୍ମାଣ କରି ପୋଲିସ ଓ ପ୍ରଶାସନ ତରଫରୁ ଚେକିଂ କଡ଼ାକଡ଼ି କରାଯାଇଛି।ବିନା କାରଣ ରେ ସହରକୁ ଆସୁଥିବା ଲୋକଙ୍କୁ ଫେରିଯିବାକୁ ନିର୍ଦେଶ ଦିଆଯାଉଛି।ଉପଜିଲ୍ଲାପାଳ ଶ୍ରୀ ମିଞ୍ଜ ନିଜେ ଉପସ୍ଥିତ ରହି ଏହି କାର୍ଯ୍ୟ ତଦାରଖ କରୁଥିବା ବେଳେ ତହସିଲଦାର ଆଲୋକ କୁମାର ପ୍ରଧାନ, ବି ଡି ଓ ଅନିଲ କୁମାର ସେଠୀ, ଆଇ ଆଇ ସି ସୁଦୀପ୍ତ କୁମାର ସାହୁ ଓ ଅନ୍ୟ ଅଧିକାରୀ ମାନେ ମଧ୍ୟ ବିଭିନ୍ନ ସ୍ଥାନରେ ରହି ଚେକିଂ ବ୍ୟବସ୍ଥା ସମ୍ଭାଳିଥିଲେ।