ହନୁମାନଗଡ଼,ରାଜସ୍ଥାନର ହନୁମାନଗଡ଼ରେ ଶନିବାର ରାତିରେ ଘଟିଯାଇଥିବା ଏକ ସଡ଼କ ଦୁର୍ଘଟଣାରେ ଗୋଟିଏ ପରିବାରର ୭ ଜଣଙ୍କ ମୃତ୍ୟୁ ଘଟିଛି । ନୌରଙ୍ଗଦେସର ନିକଟରେ ହାଇୱେ ରେ କାର୍ ଏବଂ ସିମେଂଟ ବୋଝେଇ ଟ୍ରଲି ମଧ୍ୟରେ ଧକ୍କା ହେବା ଫଳରେ କାର୍ ରେ ଯାତ୍ରା କରୁଥିବା ୭ ଜଣଙ୍କ ମୃତ୍ୟୁ ଘଟିଛି । ଦୁଇ ଜଣ ଗୁରୁତର ହୋଇଛନ୍ତି । ଘଟଣାସ୍ଥଳରେ ୫ ଜଣଙ୍କ ମୃତ୍ୟୁ ଘଟିଥିବା ବେଳେ ଗୁରୁତର ଅବସ୍ଥାରେ ୪ ଜଣଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇଥିଲା । ସେଠାରେ ଡାକ୍ତର ଦୁଇ ଜଣଙ୍କୁ ମୃତ ଘୋଷଣା କରିଥିଲେ । ମୃତକ ମାନେ ହେଲେ ନୌରଙ୍ଗଦେସରର ଗୁରବଚନ ସିଂହଙ୍କ ପତ୍ନୀ, ଦୁଇ ପୁଅ, ଦୁଇ ବୋହୂ, ଜଣେ ନାତି ଏବଂ ଜଣେ ନାତୁଣୀ ।
ଏସପି ଡଃ. ରାଜୀବ ପଚାର ଏନେଇ ସୂଚନା ଦେଇ କହିଛନ୍ତି ଯେ, ଦୁର୍ଘଟଣାଗ୍ରସ୍ତ ଏହି କାର୍ ରେ ଶିଶୁ ସମେତ ମୋଟ୍ ୯ ଜଣ ଯାତ୍ରା କରୁଥିଲେ । ଗୁରବଚନ ସିଂହଙ୍କ ପରିବାର ନିଜ ଘର ଠାରୁ ୪ କି.ମି. ଦୂର ଆଦର୍ଶନଗର ଗ୍ରାମରେ ଆୟୋଜିତ ଏକ ଜନ୍ମଦିନ କାର୍ଯ୍ୟକ୍ରମରେ ଯୋଗଦେଇ କାର୍ ଯୋଗେ ଫେରୁଥିବା ବେଳେ ବାଟରେ ରାତି ପ୍ରାୟ ୧୦ଟା ସମୟରେ ଏହି ଦୁର୍ଘଟଣା ଘଟିଥିଲା । ହନୁମାନଗଡ଼-ସର୍ଦ୍ଦାରସହର ମେଗା ହାଇୱେ ର ଲଖୁବାଲି ଶେରଗଡ଼ ମଧ୍ୟରେ ସାମ୍ନାରୁ ଆସୁଥିବା ଏହି ସିମେଂଟ ବୋଝେଇ ଟ୍ରଲିକୁ କାର୍ ଟି ଧକ୍କା ଦେଇଥିଲା ।
