ବାଲେଶ୍ବର – ବାଲେଶ୍ୱର ଜିଲା ସୋର ଥାନା ଅଧୀନ ପାଖର ପଞ୍ଚାୟତ ଗୋପୀନାଥପୁର ଗ୍ରାମର ନିରଞ୍ଜନ ମହାପାତ୍ର (୨୬) ଶୋଇଥିବା ବେଳେ ଗୁରୁବାର ସକାଳେ ସଂଜ୍ଞାହୀନ ହୋଇପଡିଥିଲେ। ପରିବାର ଲୋକେ ଜାଣିବା ପରେ ତୁରନ୍ତ ୧୦୮ ଆମ୍ବୁଲାନ୍ସକୁ ଜଣାଇଥିଲେ। ସୋର କିମ୍ବା ଅନନ୍ତପୁରରେ ୧୦୮ ନ ଥିବାରୁ ସେମାନେ ବାଧ୍ୟ ହୋଇ ଏକ ପ୍ରାଇଭେଟ୍ ଗାଡିକୁ ଡାକିଥିଲେ। ହେଲେ ନିରଞ୍ଜନଙ୍କ ଘର ପାଖକୁ ରାସ୍ତା ନ ଥିବାରୁ ଗାଡି ଯାଇ ପାରି ନ ଥିଲା। ସେଠାରୁ ପ୍ରାୟ ୩ ଶହ ମିଟର କଦର୍ଯ୍ୟ ରାସ୍ତାରେ ନିରଞ୍ଜନଙ୍କୁ ଏକ ଟ୍ରଲିରେ ବୋହି ଗାଡି ପାଖକୁ ଅଣାଯିବାରେ ବିଳମ୍ବ ହୋଇଥିଲା। ପରେ ତାଙ୍କୁ ସୋର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସୋର ଥାନା ଅଧୀନ ଅନନ୍ତପୁର ଫାଣ୍ଡି ପୋଲିସ କେସ୍ ନଂ. ୭୪/୧୯ ରୁଜୁ କରି ଶବ ବ୍ୟବଚ୍ଛେଦ କରି ଘଟଣାର ତଦନ୍ତ କରୁଛି।
