ବ୍ରହ୍ମପୁର: ଗଞ୍ଜାମ ଜିଲ୍ଲା କେ.ନୂଆଗାଁ ଥାନା ପୋଲିସ ବ୍ରାହ୍ମଣ ନୂଆପଡା ଗାଁର ୨ଭାଇ ବି.ଶ୍ୟାମସୁନ୍ଦର ଏବଂ ବି.ଶ୍ରୀରାମୁଲୁଙ୍କୁ ଗିରଫକରି ରବିବାର କୋର୍ଟଚାଲାଣ କରିଛନ୍ତି । ଉଭୟଙ୍କୁ ହତ୍ୟା ଉଦ୍ୟମ ମାମଲାରେ ଗିରଫ କରାଯାଇଥିବା ଥାନାଧିକାରୀ ମାଧବାନନ୍ଦ ନାୟକ କହିଛନ୍ତି । ଥାନା କେଶ୍ ନମ୍ବର ୧୦୮/୨୦, ଦଫା ୨୯୪, ୩୦୭, ୩୨୩, ୩୨୪, ୩୪୧, ୩୪ ଅନୁଯାୟୀ ଜାମିନ ଆବେଦନ ନାମାଞ୍ଜୁର ହେବାରୁ ଅଭିଯୁକ୍ତ ଦ୍ୱୟଙ୍କୁ ଦିଗପହଣ୍ଡି ସବ୍ଜେଲ ହାଜତକୁ ପଠାଇ ଦିଆଯାଇଛି । ନୂଆପଡା ଗ୍ରାମ ନୂଆସାହିର ମୋହନ ଗୌଡ ତାଙ୍କ ଘର ସମ୍ମୁଖରେ ଠିଆ ହୋଇଥିବା ବେଳେ ଶନିବାର ରାତି ପ୍ରାୟ ୧୦ଟାରେ ପୂର୍ବ ଶତ୍ରୁତାକୁ କେନ୍ଦ୍ରକରି ଅଭିଯୁକ୍ତ ଶ୍ୟାମସୁନ୍ଦର, ଶ୍ରୀରାମୁଲୁ ଓ ତାଙ୍କ ବାପା ବାଇରି କାତି, ଠେଙ୍ଗାରେ ତାଙ୍କୁ ଅତର୍କିତ ଆକ୍ରମଣ କରିଥିଲେ । ମୋହନଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏନେଇ ଏତଲା ହେବାପରେ ଅଭିଯୁକ୍ତ ମାନଙ୍କ ବିରୋଧରେ ମକଦ୍ଦମା ରୁଜୁ କରାଯାଇଥିଲା । ଏହି ହତ୍ୟା ଉଦ୍ୟମ ମାମଲାରେ ସମ୍ପୃକ୍ତ ଥିବା ଅନ୍ୟତମ ଅଭିଯୁକ୍ତ ବି.ବାଇରି ଗିରଫ ଭୟରେ ଫେରାର ଥିବା ତଦନ୍ତକାରୀ ପୋଲିସ ଅଧିକାରୀ ନୂଆପଡା ଫାଣ୍ଡି ଏଏସ୍ଆଇ କ୍ଷୀରୋଦ ଚନ୍ଦ୍ର ବେହେରା ସୂଚନା ଦେଇଛନ୍ତି ।
