ଜୟପୁର– କୋରାପୁଟ ଜିଲ୍ଲା ଜୟପୁର ଠାରେ ପ୍ରତିଷ୍ଠା ହୋଇ ରହିଥିବା କିଛି ବର୍ଷ ତଳର ଓବିସି ହଷ୍ଟେଲ୍ କୋଠା କାର୍ଯ୍ୟକ୍ଷମ ହେବ । ପଛୁଆବର୍ଗ ପିଲାଙ୍କ ପାଇଁ ନିର୍ମାଣ ହୋଇ ରହିଥିବା ଏହି କୋଠା ଚଳିତ ବର୍ଷ ହେବ କାର୍ଯ୍ୟକ୍ଷମ । ଏନେଇ ଜିଲ୍ଳା ପ୍ରଶାସନ ପକ୍ଷରୁ ଏବେ ପ୍ରସ୍ତୁତି ଚାଲିଛି । ଏହି ହୋଷ୍ଟେଲ୍ରେ ରହିବା ପାଇଁ ଆବେଦନ ଆହ୍ଵାନ କରାଯାଇଛି । ଜିଲ୍ଲା ମଙ୍ଗଳ ଅଧିକାରୀ ସୁନୀଲ କୁମାର ତାଣ୍ଡିଙ୍କ ପକ୍ଷରୁ ଆହ୍ଵାନ କରାଯାଇଥିବା ସୂଚନା ପ୍ରକାରେ ଜିଲ୍ଲାର ସାମାଜିକ ଓ ଅର୍ଥନୈତିକ ପଛୁଆ ବର୍ଗ/ଅନ୍ୟାନ୍ୟ ପଛୁଆ ବର୍ଗର ଉଚ୍ଚ ଶିକ୍ଷାର୍ଥି ମାନଙ୍କୁ ଏଥିରେ ଆବେଦନ ପାଇଁ କୁହାଯାଇଛି । ଏହି ଆବେଦନର ଶେଷ ଅବଧି ଅଗଷ୍ଟ ୬ ତାରିଖ ରଖାଯାଇଛି । ଯୁକ୍ତ ଦୁଇ କିମ୍ବା ତଦୁର୍ଦ୍ଧ ପିଲାଙ୍କ ପାଇଁ ଏହି ହଷ୍ଟେଲ୍ ଉଦ୍ଦିଷ୍ଟ ବୋଲି କୁହାଯାଇଛି ।
ପ୍ରକାଶ ଯୋଗ୍ୟ ଯେ, ଏହି ହଷ୍ଟେଲ ଟି କିଛି ବର୍ଷ ହେବ ତେଲିଗୁଡ଼ା ଠାରେ ନିର୍ମାଣ ହୋଇସାରିଛି । କିନ୍ତୁ, କେନ୍ଦ୍ରୀୟ ଯୋଜନାରେ ପ୍ରତିଷ୍ଠିତ ଏହି ହଷ୍ଟେଲ୍ କୁ କାର୍ଯ୍ୟକାରୀ କରାଯାଇନଥିଲା । କେନ୍ଦ୍ର ସରକାରଙ୍କ ଯୋଜନା ଅନୁସାରେ ୪୦୦ ସିଟ୍ ବିଶିଷ୍ଟ ଛାତ୍ରାବାସ ଶତକଡ଼ା ୬୦ ପ୍ରତିଶତ ଅର୍ଥ କେନ୍ଦ୍ର ସରକାର ଦେଇଥିବା ବେଳେ ୪୦ ପ୍ରତିଶତ ଅର୍ଥ ରାଜ୍ୟ ସରକାର ବହନ କରିଥିବା ବେଳେ ୪୦୦ ସିଟ୍ ବିଶିଷ୍ଟ ଛାତ୍ରୀ ନିବାସ ଖର୍ଚ୍ଚର ୯୦ ପ୍ରତିଶତ ଅର୍ଥ କେବଳ କେନ୍ଦ୍ର ସରକାର ବହନ କରିଛନ୍ତି । ଏହି ଛାତ୍ରାବାସ ଜୟପୁର ବିମାନଘାଟି ଛକ କେନାଲ୍ ନିକଟ ତେଲିଗୁଡ଼ା ଠାରେ ନିର୍ମାଣ ହୋଇଥିବା ବେଳେ ଉଦ୍ଘାଟନ ନ ହୋଇ ପଡି ରହିଥିଲା । ବର୍ତମାନ ସରକାର ପରିବର୍ତ୍ତନ ପରେ ଏହାକୁ କାର୍ଯ୍ୟକ୍ଷମ କରିବାକୁ ପ୍ରଶାସନ ଚେଷ୍ଟିତ ରହିଛି । ଆସନ୍ତା ଅଗଷ୍ଟ ୧୫ ତାରିଖ ସୁଦ୍ଧା ଏହା ଉଦ୍ଘାଟନର ଲକ୍ଷ୍ୟ ରହିଥିବା ଜିଲ୍ଲା ମଙ୍ଗଳ ଅଧିକାରୀ ସୂଚନା ପ୍ରଦାନ କରିଛନ୍ତି । ଏହି ହଷ୍ଟେଲ୍ ରେ ଛାତ୍ରଛାତ୍ରୀ ମାନେ ସଂପୂର୍ଣ୍ଣ ମାଗଣା ସୁବିଧା ପାଇବେ କିନ୍ତୁ ସେମାନଙ୍କ ପଢ଼ୁଥିବା ଅନୁଷ୍ଠାନକୁ ନିଜ ଖର୍ଚ୍ଚରେ ଯିବା ଆସିବା କରିବେ ବୋଲି ଜଣାଯାଇଛି । କେବଳ ସରକାରୀ ଅନୁଷ୍ଠାନରେ ଅଧ୍ୟୟନରତ ପିଲାଙ୍କ ପାଇଁ ଏହି ସୁବିଧା ରହିବ ବୋଲି କୁହାଯାଇଛି ।
