ଗଞ୍ଜାମ – ଆଜି ପୂର୍ବାହ୍ନ ପ୍ରାୟ ସାଢ଼େ ୧୧ଟା ସମୟରେ ଗଞ୍ଜାମ ଜିଲ୍ଲା ଶେରେଗଡ଼ ଥାନା ଅନ୍ତର୍ଗତ ସୁଳୁସୋଳା ଗ୍ରାମ ନିକଟରେ ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଘଟଣାସ୍ଥଳରେ ଜଣେ ବାଇକ୍ ଆରୋହୀଙ୍କ ମୃତ୍ୟୁ ଘଟିଛି । ଦୁର୍ଘଟଣାରେ ଅନ୍ୟ ୪ ଜଣ ଆହତ ହୋଇଛନ୍ତି । ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତି କରାଯାଇଛି । ସେମାନେ ଗୋଟିଏ ପରିବାରର ହୋଇଥିବା ଜଣାପଡିଛି ।
ସୂଚନା ଅନୁଯାୟୀ, ବଡ଼ଗଡ଼ ଥାନା ଅନ୍ତର୍ଗତ ଖାଡ଼ିପଲ୍ଲୀ ଗ୍ରାମର ସରୋଜ କୁମାର ସ୍ୱାଇଁ (୩୫) ନିଜ ବାଇକ୍ ନଂ ଓଡ଼ି୦୭ଏଫ-୫୫୯୩ ଯୋଗେ ବ୍ରହ୍ମପୁରରୁ ଘରକୁ ଫେରୁଥିବା ବେଳେ ହିଞ୍ଜିଳି ଥାନା ଅନ୍ତର୍ଗତ ବ୍ରାହ୍ମଣଛାଇ ଗ୍ରାମର ରୋହିତ ପ୍ରଧାନ (୩୨) ପତ୍ନୀ ପିଙ୍କି ପ୍ରଧାନ ଓ ଦୁଇ ପିଲାଙ୍କୁ ଧରି ଶ୍ୱଶୁର ଘର ପାଟପୁରରୁ ବାଇକ୍ ନଂ ଓଡ଼ି୦୭ଟି-୯୩୫୭ ଯୋଗେ ଫେରୁଥିଲେ । ଏହି ସମୟରେ ସୁଳୁସୋଳା ଗ୍ରାମ ନିକଟରେ ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ସରୋଜଙ୍କ ମୃତ୍ୟୁ ଘଟିଥିବା ବେଳେ ରୋହିତ, ତାଙ୍କ ପତ୍ନୀ ଓ ଦୁଇ ପିଲା ଆହତ ହୋଇଛନ୍ତି । ଆହତମାନଙ୍କୁ ଚିକିତ୍ସା ନିମନ୍ତେ ଶେରେଗଡ଼ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତି କରାଯାଇଛି । ଶେରେଗଡ଼ ପୋଲିସ ଘଟଣାସ୍ଥଳରେ ପହଂଚି ମୃତକଙ୍କ ଶବ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ଆସିକା ଡାକ୍ତରଖାନାକୁ ପଠାଇଛି । ଦୁର୍ଘଟଣାଗ୍ରସ୍ତ ଦୁଇଟି ବାଇକ୍ କୁ ପୋଲିସ ଜବତ କରିଛି । ଏ ସଂକ୍ରାନ୍ତରେ ୧୦୭/୧୯ ରେ ଏକ ଅପମୃତ୍ୟୁ ମାମଲା ରୁଜ୍ଜୁ କରି ତଦନ୍ତ ଜାରୀ ରଖିଛି ।
