ନୂଆପଡା – କଲାହାଣ୍ଡି ସାଂସଦ ବସନ୍ତ କୁମାର ପଣ୍ଡା ନୂଆପଡା ଜିଲ୍ଲାର ଖଡିଆଳ ବ୍ଲକ ଅନ୍ତର୍ଗତ ତୁକଲା ଗ୍ରାମକୁ ସାଂସଦ ଆଦର୍ଶ ଗ୍ରାମ ଭାବରେ ଗ୍ରହଣ କରିଛନ୍ତି । ଏନେଇ କଲାହାଣ୍ଡି ସାଂସଦ ଶ୍ରୀପଣ୍ଡା ଆଦର୍ଶ ଗ୍ରାମ କାର୍ଯ୍ୟକାରୀ କରିବା ସକାଶେ ଏକ ବୈଠକ ତୁକଲା ଗ୍ରାମର ରାଜୀବଗାନ୍ଧୀ ସେବା କେନ୍ଦ୍ର ଠାରେ ଆୟୋଜନ କରିଛନ୍ତି । ଏଥିରେ ସାଂସଦଙ୍କ ସହ ଖଡିଆଳ ବିଡିଓ ଉତମ କୁମାର ବାଗ, ସରପଂଚ ଭଗତରାମ ମେହେର, ଏପିଡି ଏବଂ ବ୍ଲକ ଉପସଭାପତି ନୀଲାଦ୍ରି ମେହେର ପ୍ରମୁଖ ମଂଚାସିନ ରହିଥିଲେ । ଏହି ଅବସରରେ ତୁକଲା ଆଦର୍ଶ ଗ୍ରାମ ଭାବରେ ଗଢି ତୋଳିବାକୁ ସବୁ ପ୍ରକାର ଉଦ୍ୟମ କରିବାକୁ ଆଲୋଚନା ହୋଇଥିଲା । ଗ୍ରାମବାସୀ ଗ୍ରାମର ବିଭିନ୍ନ ସମସ୍ୟା ସବୁ ଉଦ୍ଥାପନ କରି ଏସବୁର ସମାଧାନ ହେଲେ ତୁକଲା ଗ୍ରାମର ଉନ୍ନତି ସମ୍ଭବ ବୋଲି ଅଭିହିତ କରିଥିଲେ । ଆଜିର ବୈଠକରେ ବିଭିନ୍ନ ବିଭାଗୀୟ ଅଧିକାରୀ ଯୋଗ ଦେଇଥିବା ବେଳେ ସାଂସଦ ସେମାନଙ୍କ ସହ ମଧ୍ୟ ଆଲୋଚନା କରିଥିଲେ । ଆସନ୍ତା ମାର୍ଚ୍ଚ ମାସ ସୁଦ୍ଧା ପ୍ରତ୍ୟେକ ପରିବାରକୁ ବିଦ୍ୟୁତ ଓ ଜଳ ଯୋଗାଣ ସହ ଡାକ୍ତରଖାନାରେ ଟ୍ରାନ୍ସଫର୍ମର ସ୍ଥାପନ ପାଇଁ ସାଂସଦ ପ୍ରତିଶୃତି ଦେଇଥିଲେ ।
