ପୁରୀ, ପ୍ରଥମ ଓ ଦ୍ବିତୀୟ ପର୍ଯ୍ୟାୟ ନିର୍ବାଚନ ବେଳେ ଦେଖାଦେଇଥିବା ହିଂସାକୁ ନେଇ ୪୫ଟି ବୁଥରେ ମତଦାନକୁ ବାତିଲ୍ କରାଯାଇଥିଲା । ତେବେ ଆଜି ସେହି ସ୍ଥାନ ଗୁଡ଼ିକରେ ସାନି ନିର୍ବାଚନ ଚାଲିଛି । ଏହି ପରିପ୍ରେକ୍ଷୀରେ ପୁରୀ ଜିଲ୍ଲା ବ୍ରହ୍ମଗିରି ବ୍ଲକରେ ମଧ୍ୟ ସାନି ମତଦାନ ଆରମ୍ଭ ହୋଇଛି । ବ୍ରହ୍ମଗିରି ବ୍ଲକର ଚାପମାଣିକ ପଞ୍ଚାୟତ କାଶିଝରିଆ ଗ୍ରାମର ୯ ନମ୍ବର ବୁଥରେ ସାନି ମତଦାନ ଚାଲିଛି । ସକାଳ ୯ ଟାରୁ ଅପରାହ୍ନ ୩ଟା ଯାଏ ଭୋଟ ଗ୍ରହଣ ଜାରୀ ରହିବ । ଏଥିପାଇଁ ମତଦାନ କେନ୍ଦ୍ର ଗୁଡ଼ିକରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ୧ ପ୍ଲାଟୁନ ପୋଲିସ ଫୋର୍ସ ମୁତୟନ ହେବା ସହ, ଜଣେ ଅତିରିକ୍ତ ଏସପି, ଜଣେ ଡିଏସପି, ମହିଳା ପୋଲିସ ଏବଂ ବ୍ରହ୍ମଗିରି ଥାନା ଅଧିକାରୀ ଉପସ୍ଥିତ ରହିଛନ୍ତି ।
ସୂଚନାଯୋଗ୍ୟ ଯେ, ଗତ ୧୬ ତାରିଖରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ଭୋଟ ଚାଲିଥିବାବେଳେ କିଛି ଦୁର୍ବୃତ୍ତ ମତଦାନ କେନ୍ଦ୍ରରେ ପଶି ଭୋଟ ବାକ୍ସକୁ ଉଠାଇ ନେବା ସହ ତାହାକୁ ପାଣିରେ ବୁଡାଇ ଦେଇଥିଲେ । ଯାହାକୁ ନେଇ ମତଦାନ ବନ୍ଦ ହୋଇଥିଲା ।
