ଏନ୍‌ଏସି ଅଞ୍ଚଳର ସୌନ୍ଦର୍ଯ୍ୟକରଣର ବୁଲିଦେଖି ସମୀକ୍ଷାକଲେ ଉପଜିଲ୍ଲାପାଳ

ବ୍ରହ୍ମପୁର: ବ୍ରହ୍ମପୁର ଉପଜିଲ୍ଲାପାଳ ଭାବେ ଦାୟୀତ୍ୱ ନେବାପରେ ଯୁବ ଆଇଏଏସ୍ ଅଫିସ୍‌ର କୀର୍ତ୍ତିଭାସନ ଭି ନିଜ ଉପଖଣ୍ଡସ୍ତରର ବିଭାଗୀୟ ଅଧିକାରୀଙ୍କୁ ନେଇ ସମୀକ୍ଷା କରିବା ସହ କ୍ଷେତ୍ର ପରିଦର୍ଶନକରି ସମୀକ୍ଷା କରୁଥିବା ଦେଖିବାକୁ ମିଳିଛି । ଏହାସହ କୋଭିଡ୍ ନିୟମକୁ କଡାକଡି ପାଳନ କରିବା ପାଇଁ ନିଜେ ବିଭିନ୍ନ ଅଞ୍ଚଳ ବୁଲି ସ୍ଥିତି ଅନୁଧ୍ୟାନ କରୁଛନ୍ତି । ଏହି ମର୍ମରେ ଶନିବାର ସକାଳେ ଗୋପାଳପୁର ଏନ୍‌ଏସି ଅଞ୍ଚଳରେ ହେଉଥିବା ସୌନ୍ଦର୍ଯ୍ୟକରଣ ଓ ଉନ୍ନୟନ କାର୍ଯ୍ୟର ସମୀକ୍ଷା ସହ କ୍ଷେତ୍ର ପରିଦର୍ଶନକରି ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି । ଗୋପାଳପୁର ଏନ୍‌ଏସି ଅଞ୍ଚଳରେ ହୋଇଥିବା ଶିଶୁ ପାର୍କ, ୱାଲ୍ ପେଟିଂ, ମଡେଲ ଟଏଲଟ୍‌, ଅଫିସ୍ ବିଲ୍ଡିଂ, ଗେଷ୍ଟ ହାଉସ୍‌, ଖୋଲାସ୍ଥାନ, ବୃକ୍ଷରୋପଣ ଓ ମୋ ଗୋପାଳପୁରର ସୌନ୍ଦର୍ଯ୍ୟକରଣ ଓ ବିଚ୍ ଅଞ୍ଚଳ ବୁଲି ଦେଖି ସ୍ଥାନୀୟ ଅଧିକାରୀଙ୍କ କାର୍ଯ୍ୟକୁ ପ୍ରଶଂସା କରିବା ସହ ଆଗାମୀଦିନରେ ଏହି କାର୍ଯ୍ୟକୁ ସମୟସୀମା ଭିତରେ ସାରିବା ପାଇଁ ନିର୍ଦ୍ଦେଶ ଦେଇଥିଲେ । ଉପଜିଲ୍ଲାପାଳ ଖୋଦ୍ ବିଭିନ୍ନ ଅଞ୍ଚଳ ପାଦରେ ଚାଲି ଚାଲି ବୁଲିବା ସହ ଠିକା ନେଇଥିବା ସଂସ୍ଥାମାନଙ୍କ ସହ ଆଲୋଚନାକରି ଗୋପାଳପୁର ଏନ୍‌ଏସି କାର୍ଯ୍ୟନିର୍ବାହୀ ଅଧିକାରୀ ଉମାଶଙ୍କର ସେଠୀଙ୍କ ସହ ଆଲୋଚନା କରିଥିଲେ । କ୍ଷେତ୍ର ପରିଦର୍ଶନ ବେଳେ ଏନ୍‌ଏସିର ସମସ୍ତ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ ।