ବ୍ରହ୍ମପୁର: ବ୍ରହ୍ମପୁରରୁ ଆନ୍ଧ୍ରପ୍ରଦେଶକୁ ଏକ କାର୍ରେ ଚୋରା ରୁପା ବିସ୍କୁଟ ଚାଲାଣ ହେଉଥିବା ବେଳେ ଇଚ୍ଛାପୁର ପୋଲିସ ସେଥିରୁ ୬୨କିଲୋ ରୁପା ଜବତ କରିଛି । ପୋଲିସ ଆନ୍ଧ୍ରପ୍ରଦେଶର ମଚ୍ଛଲିପଟନମ୍ର ୩ଜଣ ଯୁବକ ପି.ସୁରିବାବୁ, ଏନ୍.ଗୋବିନ୍ଦ ଏବଂ ଡ୍ରାଇଭର ବି.ନାର୍ସିମୁଲ୍ଙ୍କୁ ଗିରଫ କରିଛି । ସେମାନେ ବ୍ୟବହାର କରିଥିବା କାର୍ ନମ୍ବର ଏପି.୧୬.ଇକେ-୦୮୧୮କୁ ମଧ୍ୟ ଜବତ କରିଛି । ଉକ୍ତ କାରରେ ଉପରେକ୍ତ ୩ଜଣ ଯୁବକ ବ୍ରହ୍ମପୁରରୁ ପ୍ରାୟ ୬୨କିଲୋ ଓଜନର ରୁପା ବିସ୍କୁଟ ନେଇ ଆନ୍ଧ୍ରପ୍ରଦେଶର ମଚ୍ଛଲିପଟନମ୍ ଯାଉଥିଲେ । ଏହି ସମୟରେ ଇଚ୍ଛାପୁର ଟାଉନ୍ ଥାନା ପୋଲିସ ଖବରପାଇ ଉକ୍ତ ଗାଡିକୁ ଇଚ୍ଛାପୁର ଗ୍ରାମ ନିକଟରେ ଅଟକ ରଖି ଯାଞ୍ଚ କରିଥିଲେ । ଯାଞ୍ଚ ବେଳେ ସେଥିରୁ ପ୍ରାୟ ୬୨କିଲୋ ଓଜନର ରୁପା ବିସ୍କୁଟ ପୋଲିସ ପାଇଥିଲା । ଉକ୍ତ ରୁପା ବିସ୍କୁଟର ବିଲ୍ ମଧ୍ୟ ପୋଲିସ ଉପରୋକ୍ତ ଯୁବକମାନଙ୍କୁ ମାଗିଥିଲେ । ତେବେ ସେମାନେ ବିଲ୍ଦେଖାଇପାରି ନଥିଲେ । ୩ଯୁବକଙ୍କୁ ପୋଲିସ ଗିରଫ କରିଥିବା ବେଳେ ଏନେଇ ଖୋଳତାଡ ଆରମ୍ଭ କରିଛି । ଏପରିକି ଇଚ୍ଛାପୁର ପୋଲିସ ବ୍ରହ୍ମପୁର ପୋଲିସ ସହ ଯୋଗାଯୋଗକରି ଘଟଣାର ତଦନ୍ତ ଆରମ୍ଭ କରିଛି ।
