ଶିବରାମ ଚୌଧୁରୀ, ବେଲଗୁଣ୍ଠI, 16/08, ବେଲଗୁଣ୍ଠI ବ୍ଲକ୍ ଗାଙ୍ଗପୁର ଥାନା ଅନ୍ତର୍ଗତ ଗୋବରା କଇଠ ସାହିରେ ରହୁଥିବା ବୈରାଗୀ ପଣ୍ଡାଙ୍କ ଗତ ରାତ୍ରିରେ ଦୁର୍ବୃତ୍ତମାନେ ଦୁଇଟି କବାଟର ତାଲା ଭାଙ୍ଗି ଚୋରି କରିଥିବା ଜଣା ପଡ଼ିଛି I ଦୁର୍ବୃତ୍ତମାନେ କୌଶଳ କରି ବିଭିନ୍ନ ଯନ୍ତ୍ରପାତି ଦ୍ଵାରା କବାଟର ଗେଡ଼ାକୁ ଲକ୍ଷ୍ୟ କରି ମେସିନ ଦ୍ଵାରା ହୋଲ କରି ଚୋରି କରିଥିବା ଜଣା ପଡ଼ିଛି I ଗୃହକର୍ତ୍ତା ବୈରାଗୀ ବ୍ରହ୍ମପୁରରେ ରହି କାମ କରୁଥିବା ବେଳେ ସ୍ଵାସ୍ଥ୍ୟଗତ କାରଣରୁ ତାଙ୍କ ସ୍ତ୍ରୀ ବାପ ଘରକୁ ଚାଲି ଯାଇଥିଲେ I ଘର ତାଲା ପଡ଼ିଥିବା ଚୋରମାନେ ଲକ୍ଷ୍ୟ କରି ଏହାର ସୁଯୋଗରେ ରାତିରେ ଘରକୁ ଟାର୍ଗେଟ୍ କରିଥିଲେ I ବାଡି ପଟୁ ଦୁଇଟି କବାଟ ଭାଙ୍ଗି ଗଡରେଜ ଭାଙ୍ଗି 10 ଟି ନୂଆଁ ଲୁଗା, ନଗଦ 5000 ଟଙ୍କା, ସୁନା କାନ ଫୁଲ ଏକ ହଳ, ଦୁଇଟି ସୁନା ମୁଦି ଓ ଘରର କିଛି ଆସବାବପତ୍ର ପତ୍ର ନେବା ସହ ଆଧାର କାର୍ଡ, ଘରର ପଟା ଓ ପେନଡ୍ରାଇଭ୍ ନେଇ ଚାଲି ଯାଇଥିଲେ I ଫ୍ରିଜ୍ ଏବଂ ଅନ୍ୟାନ୍ୟ କିଛି ଜିନିଷପତ୍ରକୁ ଏପଟ ସେପଟ କରି ଫୋପାଡ଼ି ଦେଇଥିଲେ I ଆଜି ଦିନ 12 ଘଣ୍ଟ 30 ମିନିଟ୍ ସମୟରେ ବୈରାଗୀଙ୍କ ସ୍ତ୍ରୀ ବାପ ଘରୁ ନିଜ ଘରକୁ ଆସିବା ପରେ ଚୋରି ହୋଇଥିବା ଜଣା ପଡିଥିଲା I ବାଡି ପଟେ ଲତାବୁଦାରେ ସୁଟକେସ୍ ଭାଙ୍ଗି ଆଧାର କାର୍ଡ, ଘର ପଟ୍ଟା ଫୋପାଡ଼ି ଦେଇଥିବା ଦେଖିବାକୁ ମିଳିଥିଲା Iଏହା ସହ ସେହି ସାହିର ଦୀନବନ୍ଧୁ ଗୌଡଙ୍କ ବାଡି ପଟୁ ଗ୍ରୀଲ ଓ କବାଟ ଭାଙ୍ଗି ଭିତରେ ପଶିବାକୁ ଚେଷ୍ଟା କରିଥିଲେ ମଧ୍ୟ ଚୋରି କରିପାରିନଥିବା ଜଣା ପଡିଛି I ବହୁ ମାସ ବ୍ୟବଧାନ ପରେ ଚୋର ମାନେ ସକ୍ରିୟ ହୋଇ ଉଠିଥିବାରୁ ରାତ୍ରି କାଳୀନ ପୋଲିସ୍ ପେଟ୍ରୋଲିଂ ପାଇଁ ବିଭିନ୍ନ ମହଲରେ ଦାବି ହୋଇଛି I ଘରେ ପୁରୁଷ ଲୋକ କେହି ନଥିବାରୁ ଥାନାରେ କେହି ଏତଲା ଦେଇ ନଥିବା ଜଣା ପଡ଼ିଛି I
