ଶ୍ରାବଣ ସୋମବାରରେ ଶୈବପୀଠ ଗୁପ୍ତେଶ୍ବର ଖାଁ ଖାଁ  

ଜୟପୁର– ଶ୍ରାବଣ ମାସରେ କାଉଡ଼ିଆମାନେ ଭକ୍ତି ଭାବରେ ବିଭିନ୍ନ ସ୍ଥାନରେ ଶୈବପୀଠ ମାନଙ୍କରେ ନିଜର ମନସ୍କାମନା ପୂର୍ଣ୍ଣ କରିବା ପାଇଁ ଜଳାଭିଷେକ କରିଥାନ୍ତି । ବିଭିନ୍ନ ନଦୀରୁ ଜଳ କାଉଡି ଧରି ବୋଲ ବମ୍ ଧ୍ଵନି ଦେଇ ରାସ୍ତା ପାର କରିଥାନ୍ତି  । ବିଭିନ୍ନ ଶୈବପୀଠ ଗୁଡିକରେ ଲକ୍ଷ ଲକ୍ଷ ଭକ୍ତଙ୍କ ସମାଗମ ହୋଇଥାଏ । ହେଲେ କରୋନା କଟକଣା ନେଇ କୌଣସି ଦେବାଳୟକୁ ଯିବାକୁ କାଉଡ଼ିଆଙ୍କୁ ମନା କରିଛନ୍ତି ସରକାର। ଫଳରେ ଭକ୍ତ ଶୂନ୍ୟ ହୋଇପଡିଛି ଗୁପ୍ତେଶ୍ଵର ଶୈବପୀଠ ।

କରୋନା ଦିନକୁ ଦିନ ରାଜ୍ୟରେ କାୟା ବିସ୍ତାର କରି ଚାଲିଛି । ତାକୁ ଦୃଷ୍ଟିରେ ରଖି ସରକାର କୌଣସି ମନ୍ଦିର ମଠକୁ ଭକ୍ତଙ୍କ ପ୍ରବେଶ ଉପରେ ରୋକ୍ ଲଗାଇଛନ୍ତି । ଶ୍ରାବଣ ମାସରେ ପ୍ରତ୍ୟେକ ସୋମବାର ଦିନ କୋରାପୁଟ ଜିଲ୍ଲା ବାବା ଗୁପ୍ତେଶ୍ଵର ପୀଠରେ ଲକ୍ଷ ଲକ୍ଷ କାଉଡ଼ିଆଙ୍କୁ ଦେଖିବାକୁ ମିଳୁଥିଲା । ହେଲେ ଚଳିତ ବର୍ଷ କରୋନା ମୁକାବିଲାକୁ ଦୃଷ୍ଟିରେ ରଖି ସରକାର ଏହା ଉପରେ ରୋକ୍ ଲଗାଇଛନ୍ତି । ତେଣୁ ଚଳିତ ବର୍ଷ ଗୁପ୍ତେଶ୍ଵର ପୀଠରେ କୌଣସି କାଉଡ଼ିଆଙ୍କୁ ଦେଖିବାକୁ ମିଳିନଥିଲା । ପ୍ରତିବର୍ଷ ଅଙ୍କା ବଙ୍କା ଜଙ୍ଗଲ ରାସ୍ତା କମ୍ପି ଉଠୁଥିଲା ବୋଲ ବମ୍ ଧ୍ଵନିରେ । ଗୁପ୍ତେଶ୍ଵର ପୀଠରେ ଜଳାଭିଷେକ ପାଇଁ ଲମ୍ବା ଲାଇନ୍ ଲାଗୁଥିଲା । ଭକ୍ତ ମାନେ ନିଜ ନିଜ କାନ୍ଧରେ କାଉଡି ଧରି ଦୀର୍ଘ ସମୟ ଅପେକ୍ଷା କରୁଥିଲେ । ରାଜ୍ୟ ତଥା ରାଜ୍ୟ ବାହାରୁ ମଧ୍ୟ ଭକ୍ତ ସମାଗମ ହେଉଥିଲା । ଆନ୍ଧ୍ର ପ୍ରଦେଶ ତଥା ପଡୋଶୀ ରାଜ୍ୟ ଛତିଶଗଡ଼ରୁ ମଧ୍ୟ ହଜାର ହଜାର ସଂଖ୍ୟାରେ ଭକ୍ତ ଜଳ ଲାଗି ପାଇଁ ଆସୁଥିଲେ । ହେଲେ ଚଳିତ ବର୍ଷ ଖାଁ ଖାଁ ଦେଖିବାକୁ ମିଳିଛି । କରୋନା ମହାମାରୀ ଚଳିତ ବର୍ଷ ଭକ୍ତଙ୍କ ଭାବାବେଗକୁ କୁଠାରଘାତ କରିଛି । ମନ୍ଦିର ମୁଖ୍ୟ ପୂଜକ ଏବଂ ସହାୟକ ନୀତିକାନ୍ତି କରୁଥିବା କହିଛନ୍ତି ଏବଂ ପୂଜକଙ୍କ ଜୀବିକାରେ ମଧ୍ୟ ବାଧା ସୃଷ୍ଟି ହୋଇଥିବା କହିଛନ୍ତି ମୁଖ୍ୟ ପୂଜକ।