ଆମ୍ବ ମାର୍କେଟ ଠାରେ କାର୍ଯ୍ୟକ୍ଷମ ହେଲା ୫୦୦ ଶର୍ଯ୍ୟା ବିଶିଷ୍ଟ କୋଭିଡ କେୟାର ସେଣ୍ଟର

ବ୍ରହ୍ମପୁର: ଆମ୍ବମାର୍କେଟ ଠାରେ ୫୦୦ ଶର୍ଯ୍ୟା ବିଶିଷ୍ଟ କୋଭିଡ କେୟାର ସେଣ୍ଟର ବୁଧବାର କାର୍ଯ୍ୟକ୍ଷମ ହୋଇଛି । ଖୁବଶୀଘ୍ର ଏଠାରେ କରୋନା ରୋଗୀ ତଥା ସନ୍ଦିଗ୍ଧଙ୍କୁ ରଖି ଚିକିତ୍ସା କରାଯିବ । ବ୍ରହ୍ମପୁର ମହାନଗର ନିଗମ ପକ୍ଷରୁ ମିଳିଥିବା ସୂଚନାପ୍ରକାରେ ନିଳକଣ୍ଠନଗର ସରସ୍ୱତୀ ଶିଶୁ ମନ୍ଦିରର ହଷ୍ଟେଲ ତଥା ବହୁତଳ କୋଠାକୁ ୫୦୦ ଶର୍ଯ୍ୟାର କୋଭିଡ କେୟାର ସେଣ୍ଟର କରାଯାଇଛି । ଏହି କୋଠାକୁ ୨ ଭାଗରେ ବିଭକ୍ତ କରାଯାଇଛି । ଗୋଟିଏ ଭାଗରେ ୨୫୦ ଶର୍ଯ୍ୟା ବିଶିଷ୍ଟ ଜିଲା କୋଭିଡ ହେଲଥ୍‍ ସେଣ୍ଟର ଭାବେ କାର୍ଯ୍ୟକ୍ଷମ ହେବାକୁ ଥିବା ବେଳେ ଅନ୍ୟ ଭାଗରେ ୨୫୦ ଶର୍ଯ୍ୟା କୋଭିଡ କେୟାର ସେଣ୍ଟର ଭାବେ କାର୍ଯ୍ୟକ୍ଷମ ହେବ ବୋଲି ସୂଚନା ମିଳିଛି । ଏହି ୨ ସେଣ୍ଟରର ପ୍ରାୟ ସମସ୍ତ ସ୍ଥାନରେ ସିସିଟିଭି ସଂଯୋଗ କରାଯାଇଛି । ସେହିପରି ଏଠାରେ ରୋଗୀଙ୍କୁ ଖାଦ୍ୟ ଯୋଗାଇବାକୁ ମୁମ୍ବାଇର ଏକ ସଂସ୍ଥା ସହ ବିଏମସି ଚୁକ୍ତି କରିଛି । ଏହି ସଂସ୍ଥାର ମେଡିକାଲରେ ରହୁଥିବା ରୋଗୀଙ୍କୁ ଖାଦ୍ୟ ଯୋଗାଣ ଅଭିଜ୍ଞତା ରହିଥିବା ବିଏମସି ପକ୍ଷରୁ କୁହାଯାଇଛି । ସୂଚନାଥାଉକି, ମହାନଗର ନିଗମ ଅଞ୍ଚଳରୁ ଦୈନନ୍ଦିନ ଚିହ୍ନଟ ହେଉଥିବା ସଂକ୍ରମିତଙ୍କୁ ପ୍ରଥମେ ଏଠାରେ ରଖାଯାଇ ଚିକିତ୍ସା କରାଯିବ । ଆବଶ୍ୟକ ପଡିଲେ ଅଧିକ ଚିକିତ୍ସା ପାଇଁ କୋଭିଡ୍ ହସ୍‌ପିଟାଲକୁ ପଠାଯିବାର ବ୍ୟବସ୍ଥା ରହିଛି । ବ୍ରହ୍ମପୁର ସହରରେ ଅତ୍ୟାଧୁନିକ କୋଭିଡ୍ କେୟାର ସେଣ୍ଟର ପ୍ରତିଷ୍ଠା ହୋଇଥିବା ଖବରପାଇ ଭୟଭୀତରେ ଥିବା ବ୍ରହ୍ମପୁରବାସୀ ସାମାନ୍ୟ ଆଶ୍ୱସ୍ତି ହୋଇଛନ୍ତି ।