ଭଦ୍ରକ – ନୂଆ ଧାନ ସହ ନୂଆ ଆଶା, ପ୍ରେମ, ଭାତୃତ୍ୱ ତଥା ଆନନ୍ଦର ଉତ୍ସବ ନେଇ ଆସିଥିବା ନବାନ୍ନ ପର୍ବ ‘ନୂଆଖାଇ ଭେଟ୍ଘାଟ’ ଧାମରା ପୋର୍ଟ ପରିସରରେ ପାଳିତ ହୋଇଯାଇଛି । ପୋର୍ଟ ପରିସରରେ ଥିବା କମୁ୍ୟନିଟିହଲଠାରେ ଆୟୋଜିତ ନୂଆଖାଇ ଭେଟଘାଟ କାର୍ଯ୍ୟକ୍ରମରେ ଧାମରା ପୋର୍ଟ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁବ୍ରତ ତ୍ରିପାଠୀ ଓ ମୁଖ୍ୟ ପରିଚାଳନା ଅଧିକାରୀ ସୁଦୀପ ଦାସଗୁପ୍ତା ଯୋଗ ଦେଇଥିଲେ । ବନ୍ଦରରେ କାର୍ଯ୍ୟରତ କର୍ମଚାରୀଙ୍କ ଭିତରେ (ମିଳନ)ଭେଟ୍ଘାଟ୍ ପାଳନ ଦ୍ୱାରା ସମସ୍ତଙ୍କ ମଧ୍ୟରେ ଏକତା ଓ ଭାଇଚାରା ସୁଦୃଢ ହେବ ବୋଲି କାର୍ଯ୍ୟକ୍ରମରେ ମତପ୍ରକାଶ ପାଇଥିଲା । ପଶ୍ଚିମ ଓଡ଼ିଶାର କୃଷି ଭିତିକ ଗଣପର୍ବ ହେଉଛି ନୂଆଖାଇ । ଚଳିତ ମାସ ସେପ୍ଟେମ୍ବର ୯ ତାରିଖରୁ ଆରମ୍ଭ ହୋଇଥିବା ଏହି ନୂଆଖାଇ ଭେଟ୍ଘାଟ ଉତ୍ସବ ମାସେ ଧରି ରାଜ୍ୟର ବିଭିନ୍ନ ସ୍ଥାନରେ ଏହାକୁ ପାଳନ କରାଯାଉଛି । ବିଶେଷ କରି ପଶ୍ଚିମ ଓଡ଼ିଶାବାସୀ ଏହାକୁ ପାଳନ କରୁଥିବା ବେଳେ ଏହି ପର୍ବ ଭାଇଚାରାର ଏକ ନିଦର୍ଶନ ହୋଇଥିବାରୁ ସମସ୍ତ ରାଜ୍ୟବାସୀ ମଧ୍ୟ ଏହାକୁ ପାଳନ କରୁଛନ୍ତି । ଏହି କାର୍ଯ୍ୟକ୍ରମରେ ପଶ୍ଚିମ ଓଡ଼ିଶାର ଅଧିବାସୀମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ବନ୍ଦରର ସମସ୍ତ କର୍ମଚାରୀ, ସେମାନଙ୍କ ପରିବାର ସଦସ୍ୟ, କୁନି କୁନି ପିଲା ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବା ସହ ଉପଭୋଗ କରିଥିଲେ ।
