-
ଓଡ଼ିଶା ସରକାରଙ୍କ ସହଯୋଗୀ ପ୍ଲାଟଫର୍ମ ଜରିଆରେ ପୌର ସଂସ୍ଥା ଗୁଡ଼ିକୁ ଉନ୍ନତ ନାଗରିକ ସେବା ଯୋଗାଇ ଦେବା ପାଇଁ ଆବଶ୍ୟକୀୟ ବିଶେଷଜ୍ଞତା
-
ପ୍ରଯୁକ୍ତିବିଦ୍ୟା ଓ ଅଭିନବ ସମାଧାନ ସହ ସଂଯୋଗ କରାଯାଉଛି ।
ଭୁବନେଶ୍ୱର, ଓଡ଼ିଶା ସରକାର ‘ଅଟଳ ନେଟୱାର୍କ ଫର ନଲେଜ, ଅର୍ବାନାଇଜେସନ ଆଣ୍ଡ ରିଫର୍ମ’ (ଅଙ୍କୁର) ମାଧ୍ୟମରେ ପୌର ସଂସ୍ଥା କୁ ଆହୁରି ଅଧିକ ସୁଦୃଢ଼ କରୁଛନ୍ତି । ଏହା ଏପରି ଏକ ସହଯୋଗୀ ବ୍ୟବସ୍ଥା, ଯାହା ପୌର ସଂସ୍ଥା ଗୁଡିକୁ ଜ୍ଞାନକୌଶଳ ପ୍ରତିଷ୍ଠାନ, ବିଶେଷଜ୍ଞ, ବିକାଶମୂଳକ ସଂଗଠନ ଓ ଉଦ୍ଭାବନ ଭାଗିଦାରୀମାନଙ୍କ ସହ ଯୋଡ଼ି ସହରୀ ସମସ୍ୟାର ସମାଧାନ ଏବଂ ନାଗରିକ ସେବାରେ ଉନ୍ନତି ଆଣୁଛି ।
ଭାରତ ରତ୍ନ ଅଟଳ ବିହାରୀ ବାଜପେୟୀଙ୍କ ଚିନ୍ତାଧାରାରୁ ଅନୁପ୍ରାଣିତ ହୋଇ ୨୦୨୫ ମେ’ ୨୮ ତାରିଖରେ ଆରମ୍ଭ ହୋଇଥିବା ‘ଅଙ୍କୁର’ ସହରୀ ସମସ୍ୟା ଓ ସମାଧାନ ମଧ୍ୟରେ ଏକ ସେତୁ ଭାବେ କାମ କରୁଛି । ଏହା ULB ଗୁଡ଼ିକୁ ସମସ୍ୟା ଚିହ୍ନଟ କରିବା, ସଠିକ୍ ଜ୍ଞାନ ଓ ପ୍ରଯୁକ୍ତିବିଦ୍ୟା ପାଇବା, ନୂଆ ପଦ୍ଧତି ଆପଣାଇବା, ପ୍ରତିଷ୍ଠାନଗତ କ୍ଷମତା ବୃଦ୍ଧି କରିବା ଏବଂ ସଫଳ ସମାଧାନଗୁଡ଼ିକୁ ବିଭିନ୍ନ ସହରରେ ପ୍ରସାରିତ କରିବାରେ ସକ୍ଷମ କରୁଛି । ଏହା ଏକ ସ୍ୱତନ୍ତ୍ର ଯୋଜନା ଭାବେ କାର୍ଯ୍ୟ କରିବା ବଦଳରେ, ଜ୍ଞାନକୌଶଳ ଏବଂ ଉଦ୍ଭାବନକୁ କାର୍ଯ୍ୟକାରିତା ମଧ୍ୟକୁ ଆଣି ସରକାରଙ୍କ ବିଦ୍ୟମାନ ସହରୀ କାର୍ଯ୍ୟକ୍ରମଗୁଡ଼ିକୁ ଅଧିକ ସୁଦୃଢ଼ କରୁଛି ।
ଗୃହନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢ଼ୀ କହିଛନ୍ତି, “ଅଙ୍କୁର ହେଉଛି ଆମର ସହରଗୁଡ଼ିକର ଆବଶ୍ୟକତାକୁ ସଠିକ୍ ଜ୍ଞାନ, ବିଶେଷଜ୍ଞତା ଏବଂ ସମାଧାନ ସହିତ ସଂଯୋଗ କରିବା । ସହରାଞ୍ଚଳ ସ୍ଥାନୀୟ ସଂସ୍ଥାଗୁଡ଼ିକର କ୍ଷମତାକୁ ମଜଭୁତ କରିବା ଏବଂ ଉଦ୍ଭାବନକୁ ପ୍ରୋତ୍ସାହିତ କରିବା ଦ୍ୱାରା, ସହରୀ ସେବାଗୁଡ଼ିକୁ ସରଳ, ଦ୍ରୁତ ଏବଂ ନାଗରିକମାନଙ୍କ ପାଇଁ ଅଧିକ ଉତ୍ତରଦାୟୀ କରିବା ଆମର ଲକ୍ଷ୍ୟ।” ଏହାର ମୂଳରେ ରହିଛି ସହଯୋଗୀ ଶାସନ ବ୍ୟବସ୍ଥାର ଏକ ମଡେଲ ।
ଏହି ପ୍ଲାଟଫର୍ମ ସରକାର, ଜ୍ଞାନକୌଶଳ ପ୍ରତିଷ୍ଠାନ, ବୈଷୟିକ ବିଶେଷଜ୍ଞ, ବିକାଶମୂଳକ ସଂଗଠନ ଏବଂ ଉଦ୍ଭାବନ ଭାଗିଦାରୀମାନଙ୍କୁ ଗୋଟିଏ ମଞ୍ଚରେ ଏକତ୍ରିତ କରିଥାଏ, ଯାହାଫଳରେ ସହରୀ ପ୍ଲାନିଂ ଏବଂ ସରକାରୀ କାର୍ଯ୍ୟ ପାଇଁ ଆବଶ୍ୟକୀୟ ବିଶେଷଜ୍ଞତା । ଯେପରିକି ପୌରପାଳିକା ଅର୍ଥନୀତି ଏବଂ ଭୂମି ପରିଚାଳନାଠାରୁ ଆରମ୍ଭ କରି ପରିବେଶ ଇଞ୍ଜିନିୟରିଂ ଏବଂ ଡିଜିଟାଲ୍ ସିଷ୍ଟମ୍ ପର୍ଯ୍ୟନ୍ତ ULB ଗୁଡ଼ିକୁ ସହଜରେ ଉପଲବ୍ଧ ହୋଇଥାଏ । ପ୍ରତ୍ୟେକ ସହରକୁ ସ୍ୱାଧୀନ ଭାବରେ ଏହିପରି ଜ୍ଞାନ ଆହରଣ କରିବାକୁ ପଡ଼ିବ ନାହିଁ, ବରଂ ‘ଅଙ୍କୁର’ ଏହାକୁ ଗୋଟିଏ ସ୍ଥାନରେ ଏକତ୍ରିତ କରିଥାଏ, ଯାହାଦ୍ୱାରା ULB ଗୁଡ଼ିକୁ ସଠିକ୍ ସମୟରେ ସଠିକ୍ ବିଶେଷଜ୍ଞତା ମିଳିପାରିଥାଏ ।
ଏହି ପଦ୍ଧତି ମାଧ୍ୟମରେ ବର୍ତ୍ତମାନ ଡିଜିଟାଲ୍ ଶାସନ, ପରିବେଶ ପରିଚାଳନା, ନିୟମାବଳୀ ସଂସ୍କାର, ଦକ୍ଷତା ବିକାଶ, ପରିମଳ, ଜୀବିକା ଏବଂ ନାଗରିକ ସଚେତନତା ଭଳି ବିଭିନ୍ନ କ୍ଷେତ୍ରରେ କାର୍ଯ୍ୟକ୍ରମଗୁଡ଼ିକୁ ସମର୍ଥନ ମିଳୁଛି । ୧୧୫ଟି ସହରରେ ପୌର ସେବା ପ୍ରଦାନକୁ ଦୃଢ଼ କରିବା ପାଇଁ ‘ସୁଯୋଗ’ ଭଳି ଡିଜିଟାଲ୍ ପଦକ୍ଷେପ କାର୍ଯ୍ୟକାରୀ ହେଉଥିବାବେଳେ, ତଥ୍ୟ-ଆଧାରିତ ହସ୍ତକ୍ଷେପ ସ୍ଥାନୀୟ ସହରୀ ସମସ୍ୟାଗୁଡ଼ିକୁ ଚିହ୍ନଟ ଏବଂ ସମାଧାନ କରିବାରେ ସହାୟକ ହେଉଛି ।
ଉଦାହରଣ ସ୍ୱରୂପ, ବିସ୍ତୃତ ଉତ୍ସ କାର୍ଯ୍ୟକ୍ରମ ଅଧୀନରେ ଭୁବନେଶ୍ୱରରେ ୨,୬୦୪ଟି ସ୍ଥାନୀୟ ପ୍ରଦୂଷଣ ସମ୍ବନ୍ଧୀୟ ସମସ୍ୟା ଚିହ୍ନଟ କରାଯାଇଥିବା ବେଳେ ସେଥିମଧ୍ୟରୁ ୧,୨୨୫ଟିର ସମାଧାନ ହୋଇସାରିଛି ଏବଂ ଅକ୍ଟୋବର ୨୦୨୬ ସୁଦ୍ଧା ୮୦ ପ୍ରତିଶତ ସମାଧାନର ଲକ୍ଷ୍ୟ ରଖାଯାଇଛି । ULB ଗୁଡ଼ିକୁ ଭଲ ଯୋଜନା ଏବଂ ଉନ୍ନତ ସେବା ପ୍ରଦାନ କରିବାରେ ସକ୍ଷମ ଅନୁଷ୍ଠାନ ଭାବେ ଗଢ଼ିତୋଳିବା ଦିଗରେ ମଧ୍ୟ ‘ଅଙ୍କୁର’ ସହାୟକ ହେଉଛି ।
କ୍ଷମତା ନିର୍ମାଣ କାର୍ଯ୍ୟକ୍ରମ ମାଧ୍ୟମରେ ୧,୧୫୦ରୁ ଅଧିକ ସରକାରୀ କର୍ମଚାରୀଙ୍କୁ ପ୍ରଶିକ୍ଷଣ ଦିଆଯାଇଛି । ଜ୍ଞାନକୌଶଳ-ଆଧାରିତ ସଂସ୍କାରଗୁଡ଼ିକ ଗୃହ ନିର୍ମାଣ, ଜମି ଉପବିଭାଗ ଏବଂ ଜମି-ବ୍ୟବହାର ନିୟମାବଳୀକୁ ସରଳ କରିବାରେ, ଯୋଜନାବଦ୍ଧ ବିକାଶ ଏବଂ ସହରୀ ଜମିର ଅଧିକ ଦକ୍ଷ ଉପଯୋଗକୁ ସହଜ କରିବାରେ ସହାୟକ ହେଉଛି ।
ଏହି ପ୍ଲାଟଫର୍ମ ସହରୀ ଉଦ୍ଭାବନରେ ଏକ ଜନ-କୈନ୍ଦ୍ରିକ ଦୃଷ୍ଟିକୋଣ ଆଣିବାରେ ସାହାଯ୍ୟ କରୁଛି । ଯନ୍ତ୍ରପାତି, ସୁରକ୍ଷା ସରଞ୍ଜାମ ଏବଂ ପ୍ରଶିକ୍ଷଣ ପରିମଳ କର୍ମଚାରୀଙ୍କ ସୁରକ୍ଷା ଓ ମର୍ଯ୍ୟାଦାକୁ ଦୃଢ଼ କରୁଛି ; ‘ଲାଇଟ୍ ହାଉସ୍ ପ୍ରୋଗ୍ରାମ’ ଭଳି ପଦକ୍ଷେପ ମାଧ୍ୟମରେ ଯୁବକମାନଙ୍କୁ ଦକ୍ଷତା ଏବଂ ନିଯୁକ୍ତି ସୁଯୋଗ ସହିତ ସଂଯୋଗ କରାଯାଉଛି ।
‘ସହଯୋଗ’ ତଥା ‘ସହଯୋଗ ପ୍ଲସ୍’ ସହରୀ ପରିବାରଗୁଡ଼ିକୁ ସରକାରୀ ଯୋଜନା ଏବଂ ଅତ୍ୟାବଶ୍ୟକ ସେବା ସହିତ ଯୋଡ଼ିବାରେ ସାହାଯ୍ୟ କରୁଛି । ‘ଅଙ୍କୁର’ ନୂତନ ସହରୀ ସମସ୍ୟାଗୁଡ଼ିକ ପାଇଁ ଯଥା – କମ୍ ମୂଲ୍ୟର ପ୍ଲାଷ୍ଟିକ୍ ବର୍ଜ୍ୟବସ୍ତୁର ପୁନଃଉପଯୋଗ, ଉନ୍ନତ ନିର୍ମାଣ ଏବଂ ଧ୍ୱଂସବଶେଷ ବର୍ଜ୍ୟବସ୍ତୁ ପରିଚାଳନା ଏବଂ ଅନ୍ୟାନ୍ୟ ସମ୍ବଳ-ଦକ୍ଷ ଅଭ୍ୟାସଗୁଡ଼ିକୁ ପରୀକ୍ଷା କରିବା, ପ୍ରଦର୍ଶନ କରିବା ଏବଂ ପ୍ରସାରିତ କରିବା ପାଇଁ ସ୍ଥାନ ସୃଷ୍ଟି କରୁଛି । ସଫଳ ପଦ୍ଧତିଗୁଡ଼ିକୁ ପରବର୍ତ୍ତୀ ସମୟରେ ବିଭିନ୍ନ ULB ଗୁଡ଼ିକରେ ଗ୍ରହଣ ଏବଂ ଅନୁକରଣ କରାଯାଇପାରିବ ।
‘ଅଙ୍କୁର’ ମାଧ୍ୟମରେ ସରକାର ଏକ ସହରୀ ଉଦ୍ଭାବନ ପରିବେଶ ପ୍ରସ୍ତୁତ କରୁଛନ୍ତି — ଯେଉଁଠାରେ ଏକ ସହର ଦ୍ୱାରା ଚିହ୍ନଟ ହୋଇଥିବା ସମସ୍ୟାକୁ ବିଶେଷଜ୍ଞତା ସହିତ ଯୋଡ଼ାଯାଇ, ଏହାକୁ ଏକ କାର୍ଯ୍ୟକ୍ଷମ ସମାଧାନରେ ପରିଣତ କରାଯାଏ, ତୃଣମୂଳ ସ୍ତରରେ ପରୀକ୍ଷା କରାଯାଏ ଏବଂ ବ୍ୟାପକ ଜନକଲ୍ୟାଣ ପାଇଁ ପ୍ରସାରିତ କରାଯାଏ ।
ବିକଶିତ ଓଡ଼ିଶା @୨୦୩୬ ସହିତ ସମନ୍ୱିତ ହୋଇ, ‘ଅଙ୍କୁର’ ଜ୍ଞାନକୌଶଳକୁ ସମାଧାନରେ ଏବଂ ସମାଧାନକୁ ଲୋକଙ୍କ ପାଇଁ ଉନ୍ନତ ସେବାରେ ପରିଣତ କରିବାର ସରକାରଙ୍କ ସାମର୍ଥ୍ୟକୁ ଆହୁରି ମଜଭୁତ କରୁଛି, ଯାହା ଓଡ଼ିଶାବ୍ୟାପୀ ପରିଷ୍କାର, ସୁରକ୍ଷିତ ଏବଂ ଅଧିକ ନାଗରିକ-କୈନ୍ଦ୍ରିକ ସହରଗୁଡ଼ିକୁ ଗଢ଼ିତୋଳିବାରେ ସହାୟକ ହେଉଛି ।
ଅଙ୍କୁର: ଜୀବନଧାରଣକୁ ଉନ୍ନତ କରୁଛି।
About the Author
