ସମ୍ବଲପୁର- ସମ୍ବଲପୁର ଜିଲ୍ଲା ବୁର୍ଲାର କଟାପାଲି ଛକରେ ଟ୍ରକ୍ ଧକ୍କାରେ ଏକ ଯାତ୍ରୀବାହି ବସ୍ ଓଲଟି ପଡିବା ଫଳରେ ୫ ଜଣ ଆହତ ହୋଇଛନ୍ତି । ସେମାନଙ୍କୁ ବୁର୍ଲା ମେଡ଼ିକାଲରେ ଭର୍ତି କରାଯାଇଛି । ଆହତ ମାନଙ୍କ ମଧ୍ୟରେ ବସ୍ ର ଡ଼୍ରାଇଭର, ହେଲପର୍ ଓ ଅନ୍ୟ ତିନି ଜଣ ଯାତ୍ରୀ ରହିଛନ୍ତି । ତେବେ ସେମାନଙ୍କର ସମ୍ପୂର୍ଣ୍ଣ ପରିଚୟ ମିଳିପାରିନାହିଁ ।
ଆଜି ସକାଳେ ବସଟି ଜୟପୁରରୁ ସମ୍ବଲପୁର ଅଭିମୁଖେ ଆସୁଥିଲା । କଟାପାଲି ଛକ ନିକଟରେ ବସ୍ ଟି ଜାତୀୟ ରାଜପଥରୁ ସହର ମଧ୍ୟକୁ ଟର୍ଣ୍ଣ କରୁଥିବା ବେଳେ ଏକ ଟ୍ରକ୍ ଏହାକୁ ପଛରୁ ଧକ୍କା ଦେଇଥିଲା । ଏହାପରେ ବସ୍ ଟି ଭାରସାମ୍ୟ ହରାଇ ରାସ୍ତା କଡ଼କୁ ଓଲଟି ପଡିଥିଲା । ଦୁର୍ଘଟଣା ଘଟାଇଥିବା ଟ୍ରକ୍ ଓ ଦୁର୍ଘଟଣାଗ୍ରସ୍ତ ବସକୁ ପୋଲିସ ଜବତ କରିଥିବା ବେଳେ ଟ୍ରକ୍ ଡ଼୍ରାଇଭର ଫେରାର୍ ହୋଇଯାଇଛି । ପୋଲିସ ଏନେଇ ଅଧିକ ତଦନ୍ତ ଚଳାଇଛି ।
