ରାୟପୁର– କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଆଜି ରବିବାରରୁ ଦୁଇଦିନିଆ ଛତିଶଗଡ ଗସ୍ତରେ ରହିବେ । ଗୃହମନ୍ତ୍ରୀ ଶନିବାର ଅଧରାତିରେ ଛତିଶଗଡରେ ପହଂଚିଛନ୍ତି । ସେ ଆଜି ରାୟପୁର ପୋଲିସ ପରେଡ ଗ୍ରାଉଣ୍ଡରେ ଆୟୋଜିତ ରାଷ୍ଟ୍ରପତି ଧ୍ୱଜ ଅଳଙ୍କରଣ ସମାରୋହରେ ସାମିଲ ହେବେ । ସମାରୋହରେ ମୁଖ୍ୟ ଅତିଥି ଶାହ ଛତିଶଗଡ ପୋଲିସକୁ ରାଷ୍ଟ୍ରପତି ଧ୍ୱଜା ପ୍ରଦାନ କରିବେ ।
ଆଜି ଦ୍ୱିପ୍ରହର ସମୟରେ ଶାହ ବସ୍ତରରେ ପହଂଚିବେ । ଜଗଦଲପୁରର ଇନ୍ଦିରା ପ୍ରିୟଦର୍ଶିନୀ ଖେଳ ମୈଦାନରେ ବସ୍ତର ଅଲମ୍ପିକ ସମାପନ ସମାରୋହରେ ମୁଖ୍ୟ ଅତିଥି ଭାବେ ଯୋଗ ଦେବେ ଶାହ । ଏହି ଅବସରରେ ଅମିତ ଶାହ ବସ୍ତରର ଖେଳାଳିଙ୍କୁ ପୁରସ୍କୃତ କରିବେ । ଏହାପରେ ଶାହ ଜଗଦଲପୁର ସର୍କିଟି ହାଉସରେ ପହଂଚିବେ । ଅସ୍ତ୍ରଶସ୍ତ୍ର ଛାଡି ସମାଜର ମୁଖ୍ୟସ୍ରୋତରେ ସାମିଲ ହୋଇଥିବା ନକ୍ସଲଙ୍କୁ ଭେଟିବେ ଶାହ ।
