ଚମ୍ପୁଆ, ଚମ୍ପୁଆ ରେଞ୍ଜ ଅନ୍ତର୍ଗତ ଚମ୍ପୁଆ ସେକ୍ସନରେ ହାତୀ ପଲ ଲୋକଙ୍କ ନିଦ ହଜେଇ ଦେଇଥିବା ବେଳେ କାଳିକା ପ୍ରସାଦ ସଂରକ୍ଷିତ ଜଙ୍ଗଲରେ ଡେରା ପକାଇ ଥିବା ଗୋଠ ଛଡା ଦନ୍ତା ବନ ବିଭାଗକୁ ନାକେଦମ୍ କରିଛି। ପୂର୍ବରୁ ଏହି ଦନ୍ତା ହାତୀଟି ଗାଁ ଗାଁ ରେ ଆତଙ୍କ ସୃଷ୍ଟି କରିଥିବା ବେଳେ ଏବେ କାଳିକାପ୍ରସାଦ ସଂରକ୍ଷିତ ଜଙ୍ଗଲ ଅନ୍ତର୍ଗତ ରଜିଆ ଜଙ୍ଗଲରେ ରହି ଆତଙ୍କ ରାଜ ଚଳାଇ ଥିବା ଦେଖିବାକୁ ମିଳିଛି। ହାତୀଟି ରଜିଆ ଜଙ୍ଗଲ ମଧ୍ୟରେ ଯାଇଥିବା ୩୩ କେଭି ବିଦ୍ୟୁତ୍ ଖୁଣ୍ଟକୁ ଶୁଣ୍ଢରେ ଠେଲି ଉପାଡ଼ିବାର ଚେଷ୍ଟା କରିବା ସହ ଖୁଣ୍ଟରେ ଲାଗିଥିବା ଷ୍ଟେ ତାର ଟିକୁ ମଧ୍ୟ ଉପାଡ଼ି ବାକୁ ଚେଷ୍ଟା କରୁଥିବା ଦେଖିବାକୁ ମିଳିଥିଲା। ଖୁଣ୍ଟକୁ ହାତୀଟି ସବୁ ବଳ ପ୍ରୟୋଗ କରି ଠେଲିବାରେ ଲାଗିଥିଲା। ଲାଗୁଥିଲା ଯେପରି ଖୁଣ୍ଟ ଉପରେ ହାତୀ ଟିର ପୁରୁଣା ରାଗ ରହିଛି। ହାତୀଟିକୁ ବିଦ୍ୟୁତ ଖୁଣ୍ଟ ଠାରୁ ଦୁରକୁ ଘଉଡ଼ାଇବା ପାଇଁ ବନ ବିଭାଗ ଦିନ ସାରା ନାକେଦମ୍ ହୋଇଥିଲା। ଦୀର୍ଘ ପାଞ୍ଚ ଘଣ୍ଟା ଧରି ହାତୀ ଟି ବିଭାଗ କୁ ନାକେଦମ୍ କରିଥିଲା। ସୂଚନା ଯୋଗ୍ୟ କି, ଗତ ବର୍ଷ ଡିସେମ୍ବର ମାସ ପ୍ରଥମ ସପ୍ତାହରେ ରଜିଆ ଜଙ୍ଗଲ ଦେଇ ଯାଇଥିବା ଉକ୍ତ ୩୩ କେଭି (୫୫ ନଂ) ବିଦ୍ୟୁତ ଖୁଣ୍ଟ ତଳେ ଏକ ମାଈ ହାତୀର ଗଳିତ ଶବ ଉଦ୍ଧାର ହୋଇଥିଲା । ହାତୀର ଗୋଡରେ ବିଦ୍ୟୁତ୍ ଖୁଣ୍ଟରୁ ଆସିଥିବା ଷ୍ଟେ ତାରଟି ଲାଗିଥିବା ଦେଖିବାକୁ ମିଳିଥିଲା। ବିଦ୍ୟୁତ୍ ଆଘାତ କାରଣରୁ ହାତୀର ମୃତ୍ୟୁ ହୋଇଥିବା ନେଇ ବନ ବିଭାଗ କହିଥିବା ବେଳେ ବିଦ୍ୟୁତ୍ ବିଭାଗ ପକ୍ଷରୁ ତାହାକୁ ଅସ୍ୱୀକାର କରା ଯାଇଥିଲା। ବ୍ୟବଚ୍ଛେଦ ପରେ ହାତୀଟିକୁ ସେଇ ବିଦ୍ୟୁତ ଖୁଣ୍ଟ ନିକଟରେ ଗାତ ଖୋଳି ପୋତି ଦିଆ ଯାଇଥିଲା। ଆଜି ସେହି ବିଦ୍ୟୁତ୍ ଖୁଣ୍ଟଟିକୁ ହାତୀଟି ଆକ୍ରମଣ କରିଥିବା ଦେଖିବାକୁ ମିଳିଛି । ଖବର ପାଇ ବିଦ୍ୟୁତ ବିଭାଗର ଅଧିକାରୀ ଘଟଣାସ୍ଥଳରେ ପହଞ୍ଚିଥିଲେ । ଏଥି ଯୋଗୁଁ ଚମ୍ପୁଆ ଅଞ୍ଚଳରେ ଦିନ ବେଳେ ଦୀର୍ଘ ସମୟ ଧରି ବିଦ୍ୟୁତ କାଟ ହୋଇଥିଲା। ବିଭାଗୀୟ ଅଧିକାରୀ ମାନେ ଜଙ୍ଗଲ ଭିତରକୁ ଯିବାକୁ ସାହସ କରିପାରି ନ ଥିଲେ। ଦୀର୍ଘ ସମୟ ଧରି ଉତ୍ପାତ କରିବା ପରେ ହାତୀଟି ସେଠାରୁ ପଳାଇଥିଲା।
