ଭଦ୍ରକ– ଉତର ପ୍ରଦେଶ ପ୍ରୟାଗରାଜର ମଦ୍ରାସାରେ ନକଲି ନୋଟ୍ ଏବଂ ନୋଟ୍ ଛପା ମେସିନ୍ ଜବତ ହେବା ଘଟଣାର ପୋଲିସ ୪ ଜଣଙ୍କୁ ଗିରଫ କରିଥିବା ବେଳେ ମାଷ୍ଟର ମାଇଣ୍ଡ ଭଦ୍ରକର ଜାହିର ଖାନ୍ ବୋଲି ଜଣାପଡିଛି । ଜାହିରର ବାପା ସାଜିଦ ଖାନ୍ କହିଛନ୍ତି ଯେ, ଯେଉଁ ଦିନ ତା ନାମରେ ମାମଲା ରୁଜ୍ଜୁ ହେଲା । ତା ପରଦିନ ମୁଁ ଘଟଣା ବାବଦରେ ପୋଲିସ ନିକଟରୁ ଖବର ପାଇଥିଲି ଯେ, ସେ ଯେଉଁ ରୁମ୍ ରେ ରହୁଥିଲା ସେଠାରୁ ନକଲି ନୋଟ୍ ଏବଂ ନୋଟ୍ ଛପା ମେସିନ୍ ଜବତ ହୋଇଛି । ଜାହିର ପୋଲିସ ହେପାଜତରେ ଅଛି । ତେବେ ସେ କିପରି ଏମିତି କାମ କଲା, କେଉଁଠି କଲା, ତା ସହିତ ଅନ୍ୟ କେଉଁମାନେ ଘଟଣାରେ ସାମିଲ୍ ଅଛନ୍ତି, ତାର ତଦନ୍ତ ଦାୟିତ୍ୱ ପୋଲିସର । ପୋଲିସ ସେ କାମ କରିବ । ଯେଉଁ ମାନେ ଏଭଳି କାର୍ଯ୍ୟ କରିଛନ୍ତି ସେମାନଙ୍କୁ ଦଣ୍ଡ ମିଳିବା ଉଚିତ୍ । ମା ବାପା ଏଭଳି ଭୁଲ୍ କାର୍ଯ୍ୟରେ ପୁଅର ପକ୍ଷ ନେବା ଅନୁଚିତ୍ । ପୁଅ ପାଠପଢାରେ ଭଲ କରୁନଥିବାରୁ ମୁଁ ତା ଉପରେ ଅସନ୍ତୁଷ୍ଟ ଥିଲି । ପ୍ରାୟ ୭ରୁ ୮ ମାସ ହେବ ତା ସହିତ କଥା ହୋଇନଥିଲି । ପୁଅ ଦୋଷ କରିଥିଲେ ଦଣ୍ଡ ପାଉ । ଘଟଣାରେ ଜଡ଼ିତ ଥିବା ଅନ୍ୟ ସହଯୋଗୀଙ୍କୁ ମଧ୍ୟ ସମାନ ଦଣ୍ଡ ମିଳୁ ।
