ନୂଆଦିଲ୍ଲୀ– କଂଗ୍ରେସ ସାଂସଦ ତଥା ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ଆଜି ନିଜ ଦିବଂଗତ ପିତା ଓ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧିଙ୍କ 80ତମ ଜୟନ୍ତୀ ଅବସରରେ ବୀର ଭୂମିରେ ପହଂଚି ତାଙ୍କୁ ଶ୍ରଦ୍ଧାଂଜଳି ଜ୍ଞାପନ କରିଛନ୍ତି । ରାହୁଲ ବୀର ଭୂମିରେ ତାଙ୍କ ସମାଧିରେ ଫୁଲ ଦେଇଛନ୍ତି । ଏହି ଅବସରରେ କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସ୍ମରଣ କରିଛନ୍ତି । ଖଡଗେ ଏକ୍ସ ହ୍ୟାଣ୍ଡେଲରେ ଲେଖିଛନ୍ତି ଯେ, ଆଜି ଦେଶ ସଦଭାବନା ଦିବସ ପାଳନ କରୁଛି । ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧି ଭାରତର ମହାନ ସୁପୁତ୍ର ଥିଲେ । ସେ କୋଟି କୋଟି ଭାରତୀୟଙ୍କ ମଧ୍ୟରେ ଆଶାର କିରଣ ଜାଗ୍ରତ କରିଥିଲେ ଏବଂ ନିଜର ଅଦ୍ଭୁତପୂର୍ବ ଯୋଗଦାନରେ ଭାରତକୁ ଏକବିଂଶତମ ଶତାବ୍ଦୀରେ ପହଂଚାଇଥିଲେ ।
