ନୂଆପଡା- ନୂଆପଡା ଜିଲ୍ଲା ଖଡିଆଳ ବିଜ୍ଞାପିତ ଅଂଚଳ ପରିଷଦ ପକ୍ଷରୁ ସହର ସାରା ଏଲଇଡି ଷ୍ଟ୍ରିଟ ଲାଇଟ ଲଗାଯାଇଥିବା ବେଳେ ଏହି ଷ୍ଟ୍ରିଟଲାଇଟ ଚୋରୀ ଅଭିଯୋଗରେ ଖଡିଆଳ ପୁଲିସ ଜଣକୁ ଗିରଫ କରି କୋର୍ଟ ଚାଲାଣ କରିଥିବା ନେଇ ଥାନାଧିକାରୀ କୈଳାସ ଚନ୍ଦ୍ର ସେଠୀ ସୂଚନା ଦେଇଛନ୍ତି । ସୂଚନାମତେ ଖଡିଆଳ ସହରରେ ଲାଗିଥିବା ଏଲଇଡି ଷ୍ଟ୍ରିଟ ଲାଇଟ ଗୁଡିକ ବିଭିନ୍ନ ଦିନରେ ଚୋରୀ ହୋଇଥିଲା । ଏନେଇ ବିଜ୍ଞାପିତ ଅଂଚଳ ପରିଷଦର ଜେଇ ତାମ୍ରଧ୍ୱଜ ମାଝୀ ଖଡିଆଳ ଥାନାରେ ଲିଖିତ ଅଭିଯୋଗ ପରେ ଖଡିଆଳ ପୁଲିସ ତଦନ୍ତ ଆରମ୍ଭ କରିଥିଲା । ତଦନ୍ତ ବେଳେ ଭାଲୁଡୁଙ୍ଗରୀ ଗ୍ରାମର ସୁବ୍ରତ ପଟେଲଙ୍କୁ ପୁଲିସ ଅଟକ ରଖି ପଚରା ଉଚୁରା ପରେ ସେ ୨୮ ଗୋଟି ଏଲଇଡି ଷ୍ଟ୍ରିଟ ଲାଇଟ ବିଭିନ୍ନ ସମୟରେ ଚୋରୀ କରିଥିବା ନେଇ ସ୍ୱିକାର କରିଥିଲେ । ପୁଲିସ ତାଙ୍କ ଠାରୁ ୨ ଗୋଟି ଏଲଇଡି ଷ୍ଟ୍ରିଟ ଲାଇଟ ଉଦ୍ଧାର କରିଥିବା ବେଳେ ଚୋରୀ ଅଭିଯୋଗରେ ସୁବ୍ରତ ପଟେଲଙ୍କୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ମିଳିଛି । ଏହି ଘଟଣାର ତଦନ୍ତ ଦାୟିତ୍ୱ ଏସଆଇ ଡମ୍ବରୁଧର ପ୍ରଧାନ ନେଇଥିବା ସୂଚନା ମିଳିଛି । ଅନ୍ୟପକ୍ଷରେ ଗୋଟିଏ ଏଲଇଡି ଷ୍ଟ୍ରିଟ ଲାଇଟର ଦାମ ୭ ରୁ ୮ ହଜାର ଟଙ୍କା ରହିଥିବା ଜଣାପଡିଛି ।
