କଟକ- କଟକ ଏସସିବି ମେଡ଼ିକାଲ ଆଇସିୟୁରେ ଚିକିତ୍ସାଧିନ ଥିବା ଜଣେ ଅଭିଯୁକ୍ତ ଗତକାଲି ବିଳମ୍ବିତ ରାତିରେ ସେଠାରୁ ଚମ୍ପଟ୍ ମାରିଛି । ଆଇସିୟୁ ଶଯ୍ୟାରେ ହ୍ୟାଣ୍ଡକପ୍ ଲାଗି ରହିଥିଲେ ସୁଦ୍ଧା ଅଭିଯୁକ୍ତ କୌଶଳ କ୍ରମେ ସେଠାରୁ ଫେରାର୍ ହୋଇଯାଇଛି । ଅଭିଯୁକ୍ତକୁ ଧରିବା ପାଇଁ ପୋଲିସ ପ୍ରୟାସ ଚଳାଇଛି । ଅଭିଯୁକ୍ତ ଜଣକ ହେଉଛି ଆଲୋକ କୁମାର ସାହୁ (୨୨) ।
ଗତ ୪ ତାରିଖରେ ରଘୁନାଥପୁରର ଏକ ମଦ ଦୋକାନରୁ ଚୋରି ଅଭିଯୋଗରେ ପଚରା ଉଚରା ପାଇଁ ଆଲୋକକୁ ଥାନାକୁ ଆଣିଥିଲା ପୋଲିସ । କିନ୍ତୁ, ସେଠାରେ ଶୌଚାଳୟକୁ ଯାଇଥିବା ବେଳେ ସେ ଫିନାଇଲ୍ ପିଇ ଦେଇଥିଲା । ଗୁରୁତର ଅବସ୍ଥାରେ ତାକୁ ପ୍ରଥମେ ରଘୁନାଥପୁର ମେଡ଼ିକାଲ ଏବଂ ପରେ ଅଧିକ ଚିକିତ୍ସା ନିମନ୍ତେ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ସେଠାରେ ସେ ଆଇସିୟୁରେ ଚିକିତ୍ସାଧିନ ଥିଲା । ରଘୁନାଥପୁର ଥାନାର ଦୁଇ ପୋଲିସ କର୍ମଚାରୀ ତାକୁ ଜଗି ରହିଥିଲେ । ହେଲେ ଅଭିଯୁକ୍ତ ଆଲୋକ କିପରି ପୋଲିସ ହେପାଜତରୁ ଫେରାର୍ ହେଲା, ତାହା ସମସ୍ତଙ୍କୁ ଚକିତ କରିଛି ।
