ଚମ୍ପୁଆ, ପ୍ରତୀକ୍ଷାର ଅନ୍ତ ଘଟିଛି। ଆଜି ବିଜୁ ଜନତା ଦଳ ତାର ଷଷ୍ଠ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣାରେ ଚମ୍ପୁଆର ପୂର୍ବତନ ବିଧାୟକ ତଥା ହେଭିୱେଟ ନେତା ସନାତନଙ୍କୁ ପ୍ରାର୍ଥୀ କରିଛି। ଟିକଟ ଘୋଷଣା ହେବା ପରେ ଚମ୍ପୁଆରେ ସନାତନଙ୍କ ସମର୍ଥକ ମହଲରେ ଖୁସିର ଲହରୀ ଖେଳି ଯାଇଛି। ତାଙ୍କ ସମର୍ଥକ ମାନେ ଚମ୍ପୁଆରେ ଆତସବାଜି କରି ଖୁସି ଜାହିର କରିଥିବା ଦେଖିବାକୁ ମିଳିଛି।
ସୂଚନାଯୋଗ୍ୟକି, ଦୀର୍ଘ ଦିନ ହେବ ଚମ୍ପୁଆରେ ବିଜେଡି କାହାକୁ ପ୍ରାର୍ଥୀ କରିବ ଏ ନେଇ ବିଭିନ୍ନ ସମୟରେ ବହୁ କଥା ଶୁଣିବାକୁ ମିଳୁଥିଲା। କେତେବେଳେ ସନାତନ ବିଜେଡିରୁ ପ୍ରାର୍ଥୀହେବେ ତ କେତେବେଳେ ବିଜେପିରେ ସାମିଲ ହେବା ନେଇ ଆଲୋଚନା ହୋଇ ଆସୁଥିଲା। ତେବେ ବିଜେଡି ଆଶାୟୀ ଭାବେ ବିଧାୟିକା ମିନାକ୍ଷୀ ମହାନ୍ତଙ୍କ ସହିତ ସନାତନଙ୍କ ଚିର ପ୍ରତିଦ୍ବନ୍ଦୀ କୁଶ ଆପଟଙ୍କ ନାମ ମଧ୍ୟ ଶୁଣିବାକୁ ମିଳୁଥିଲା। ତେବେ ଆଜି ବିଜେଡି ତାର ପ୍ରାର୍ଥୀ ତାଲିକା ଘୋଷଣା କରିବା ପରେ ସବୁ ଚର୍ଚ୍ଚାର ଅବସାନ ଘଟିଛି।
ଅନ୍ୟପଟେ ଦଳ କୁଶ ଆପଟଙ୍କୁ ଆଜି ବିଜୁ ଜନତା ଦଳର ଜିଲ୍ଲା ସଭାପତି ମଧ୍ୟ ଘୋଷଣା କରିଥିବାରୁ ଚମ୍ପୁଆରେ ବିଜେଡି କର୍ମୀଙ୍କ ଉତ୍ସାହ ବହୁଗୁଣିତ ହୋଇଥିବା ଦେଖିବାକୁ ମିଳିଛି।
