ଭଦ୍ରକ – ଧାମରା ନିକଟସ୍ଥ ଚନ୍ଦନୀପାଳଠାରେ ୩ଜଣ ମତ୍ସ୍ୟଜିବୀ ମାଛ ମାରିବାକୁ ଯାଉଥିବା ବେଳେ ଧାମରା ବନ୍ଦର କୁ ଆସୁଥିବା ଜାହାଜ ଲହଡି ମାଡରେ ଆହତ ହୋଇଛନ୍ତି । ଖବରରୁ ପ୍ରକାଶ ଚନ୍ଦନୀପାଳ ରୁ ଏକ ଛୋଟ ଡଙ୍ଗା ନେଇ ୩ଜଣ ମତ୍ସ୍ୟଜିବୀ ସମୁଦ୍ରକୁ ମାଛ ଧରିବାକୁ ଯାଇଥିଲେ । ଧାମରା ବନ୍ଦର ମଧ୍ୟକୁ ଆସୁଥିବା ଏକ ଜାହାଜ ଦ୍ରୁତ ଗତିରେ ଆସୁଥିବା ବେଳେ ଏହାର ଲହଡି ମାଡରେ ସଂପୃକ୍ତ ଡଙ୍ଗାଟି ସମୁଦ୍ରରେ ଓଲଟି ପଡିଥିଲା । ସଙ୍ଗେ ସଙ୍ଗେ ଧାମରା ବନ୍ଦର ନିରାପତା ଅଧିକାରୀ ବୋଟରେ ଯାଇ ଲହଡିରେ ଭାସି ଯାଉଥିବା ୩ଜଣ ମତ୍ସ୍ୟଜିବୀଙ୍କୁ ଉଦ୍ଧାର କରି ଧାମରା ମେରାଇନ ଥାନାକୁ ହସ୍ତାନ୍ତରିତ କରିଥିଲେ ।ଧାମରା ମେରାଇନ ଥାନାଧିକାରୀ ସେମାନଙ୍କୁ ନେଇ ସ୍ଥାନୀୟ ସ୍ୱାସ୍ଥ୍ୟକେନ୍ଦ୍ରରେ ସେମାନଙ୍କୁ ସ୍ୱାସ୍ଥ୍ୟ ପରୀକ୍ଷା କରିବା ପରେ ସେମାନଙ୍କୁ ସେମାନଙ୍କ ପରିବାର ବର୍ଗଙ୍କୁ ହସ୍ତାନ୍ତରିତ କରିଥିଲେ । ସମୁଦ୍ରର ଜିରୋ ପଏଂଟରୁ ଧାମରା ବନ୍ଦର ଇଲାକାକୁ ଜାହାଜ ଆସୁଥିବା ସମୟରେ ଏହି ଚ୍ୟାନେଲ ଦେଇ ଯାତାୟତ କରୁଥିବା ସମସ୍ତ ଯନ୍ତ୍ରଚାଳିତ ବୋଟକୁ ଏହି ସମୟରେ ସମୁଦ୍ରକୁ ନ ଛାଡିବା ପାଇଁ ବାରଣ କରିବା ସହ ନିରାପତା କୁ କଡାକଡି କରିବା ଜରୁରୀ ହୋଇ ପଡିଛି ବୋଲି ସାଧାରଣରେ ମତ ପ୍ରକାଶ ପାଇଛି । ଏଥିପ୍ରତି ବନ୍ଦର କର୍ତୁପକ୍ଷ ଦୃଷ୍ଟି ଦେବାକୁ ଦାବୀ ହୋଇଛି ।
