ସୋନପୁର – ସୋନପୁର-ବଲାଙ୍ଗିର ରାସ୍ତାର ଅର୍ଜ୍ଜୁନପୁର ଛକ ନିକଟରେ ପୋଲିସ ଭ୍ୟାନ୍ ଧକ୍କାରେ ଦୁଇ ଜଣଙ୍କର ମୃତ୍ୟୁ ଘଟିଛି । ମୃତକ ମାନେ ହେଲେ ଜଳନ୍ଧର ବୁଡେକ ଓ ଦେବେନ୍ଦ୍ର ମଲ୍ଲିକ । ସେମାନଙ୍କ ଘର ବଲାଙ୍ଗିରର ତୁଷୁରା ଥାନା ଅନ୍ତର୍ଗତ ସନ୍ଧିସରା ଗ୍ରାମରେ । ଆଜି ପୂର୍ବାହ୍ନ ପ୍ରାୟ ୧୧ଟା ସମୟରେ ଏହି ଦୁର୍ଘଟଣା ଘଟିଥିଲା । ଘଟଣାରେ ପୋଲିସ ଭ୍ୟାନ୍ ଡ୍ରାଇଭର ବାବୁଲ ସେଠୀକୁ ଗିରଫ କରିଛି ।
ଆଜି କଲେଜରେ ଦେବେନ୍ଦ୍ରଙ୍କ ଆଡମିଶନ ଥିଲା । ସେଥିପାଇଁ ଦେବେନ୍ଦ୍ର ଓ ଜଳନ୍ଧର ବାଇକ୍ ଯୋଗେ ସୋନପୁରରୁ ଆସୁଥିଲେ । ଏହି ସମୟରେ ପୋଲିସ ଭ୍ୟାନ୍ ଟି ସୋନପୁରରୁ ମୁଦାଲା ନେଇ ଯାଉଥିବା ବେଳେ ଅର୍ଜ୍ଜୁନ ପୁର ଛକରେ ବାଇକ୍ କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ବାଇକ୍ ରୁ ଛିଟିକି ପଡି ଉଭୟଙ୍କର ମୃତ୍ୟୁ ଘଟିଥିଲା । ଦୁର୍ଘଟଣା ସମ୍ପର୍କରେ ଖବର ପାଇ ସୋନପୁର ପୋଲିସ ସେଠାରେ ପହଂଚି ଉଭୟଙ୍କର ମୃତଦେହ ଜବତ କରିବା ସହ ବ୍ୟବଚ୍ଛେଦ ନିମନ୍ତେ ପଠାଇଛି । ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜ୍ଜୁ କରି ଘଟଣାର ତଦନ୍ତ ଚଳାଇଛି ।
