ଭୂତ ଭୟରେ ସରକାରୀ ବିଦ୍ୟାଳୟରେ ପଡ଼ିଲା ତାଲା

ବିଶ୍ବାସ ନହେଲେ ବି ଘଟଣାଟି ସତ, ଉକ୍ତ ଛାତ୍ରବାସରେ ଆଜକୁ ୩ ଦିନ ହେବ ଭୂତର ଭୟ ଦେଖା ଦେଇଛି । ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୪୦ଜଣ ଛାତ୍ରଛାତ୍ରୀ ରହୁଥିବା ବେଳେ ବର୍ତ୍ତମାନ ଏହି ସ୍କୁଲ ପରିସର ପାଲଟିଛି ଶୂନଶାନ । ଭୌତିକ କାଣ୍ଡ କାରଣରୁ ୨ଦିନ ମଧ୍ୟରେ ୭ ଜଣ ଛାତ୍ରୀ ଚେତା ଶୂନ୍ୟ ହୋଇ ହରିଚନ୍ଦନପୁର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହେବା ପରେ ସ୍କୁଲରେ ଭୟର ବାତାବରଣ ଦେଖା ଯାଇଥିଲା । ଯାହା ଫଳରେ ବିଦ୍ୟାଳୟକୁ ଛାତ୍ରଛାତ୍ରୀ ଆସିବାକୁ ଭୟ କରୁଛନ୍ତି । ହଷ୍ଟେଲ ପାଶ୍ବରେ ଥିବା ପରିଶ୍ରାଗାରକୁ ଯିବା ମାତ୍ରେ ଛାତ୍ରୀମାନେ ଚିତ୍କାର କରି ଚେତା ଶୂନ୍ୟ ହୋଇ ପଡୁଛନ୍ତି । ଚିକିତ୍ସା ପରେ ଫେରିଥିବା କିଛି ଛାତ୍ରୀ ସ୍କୁଲ ପରିସରରେ ପହଁଞ୍ଚିବା ପରେ ପୁଣି ଚେତା ଶୂନ୍ୟ ହୋଇଯିବା ଘଟଣା ସ୍କୁଲରେ ଭୟର ବାତାବରଣ ବଢାଇବା ସହ ଅଭିଭାବକମାନଙ୍କୁ ଚିନ୍ତାରେ ପକାଇଛି । ଭୟଭିତ ଅଭିଭାବକ ମାନେ ନିଜ ନିଜ ପିଲାମାନଙ୍କୁ ସ୍କୁଲରୁ ଘରକୁ ନେଇ ଯାଇଛନ୍ତି । ଯାହା ଫଳରେ ବିଦ୍ୟାଳୟରେ ପଡ଼ିଛି ତାଲା ।

 ତେବେ ଗ୍ରାମବାସୀଙ୍କ କହିବା ଅନୁଯାୟୀ ପୂର୍ବରୁ ଏହି ସ୍ଥାନରେ ଭୌତିକ ଘଟଣା ସାମ୍ନାକୁ ଆସୁଥିଲା, କିନ୍ତୁ ସ୍କୁଲ ଆରମ୍ଭ ପର ଠାରୁ କୌଣସି ଘଟଣା ସାମ୍ନାକୁ ଆସିନଥିଲା । ମାତ୍ର ଏବେ ଏହିପରି ଘଟଣା ପୁଣିଥରେ ସାମ୍ନାକୁ ଆସିବା ପରେ ସମସ୍ତଙ୍କ ପାଇଁ ଚିନ୍ତାର କାରଣ ପାଲଟିଛି । ଭୌତିକ କାରଣ ହେଉ କିମ୍ବା ଅନ୍ୟ କୌଣସି କାରଣ ହେଉ ଏହି ଘଟଣା ଦିଗରେ ଶିଘ୍ର ପଦକ୍ଷେପ ଗ୍ରହଣ କରି ସ୍କୁଲରେ ଶିକ୍ଷାଦାନ ସ୍ବାଭାବିକ କରିବା ପାଇଁ ଦାବି ହୋଇଛି । ତେବେ ଭୂତ ଭୟ ହେଉକି ଅନ୍ୟ କୌଣସି କାରଣ ହେଉ ସ୍କୁଲ ଛାତ୍ରଛାତ୍ରୀ ଶୂନ୍ୟ ହେବା ବର୍ତମାନ ଚିନ୍ତାର କାରଣ ହୋଇଛି । ଏଥିସହ ବିଦ୍ୟାଳୟର ପ୍ରଧାନ ଶିକ୍ଷକ ଏହାର ଶିକାର ହୋଇ ପ୍ରଥମେ ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି ପରେ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର ହୋଇଥିବାର ଜଣାପଡିଛି । ପ୍ରଶାସନ ଏଥିପ୍ରତି ଦୃଷ୍ଟି ଦେଇ ପ୍ରକୃତ ସତ୍ୟାସତ୍ୟ ସାମ୍ନାକୁ ଆଣି ପିଲାମାନଙ୍କ ମଧ୍ୟରୁ ଭୟ ଦୂର କରିବା ନିହାତି ଜରୁରୀ ହୋଇଛି ।