ଗଞ୍ଜାମ, ବାତ୍ୟା ମାଣ୍ଡୋସ୍ ର ପ୍ରଭାବ ଗଞ୍ଜାମ ଜିଲ୍ଲାରେ ଦେଖିବାକୁ ମିଳିଛି । ଗତକାଲି ରାତିରୁ ଜିଲ୍ଲାର ବିଭିନ୍ନ ସ୍ଥାନରେ ଝିପିଝିପି ବର୍ଷା ସାଙ୍ଗକୁ କୋହଲା ପାଗ ଲାଗି ରହିଛି । କ୍ଷେତରେ ପାଚିଲା ଧାନ ରହିଥିବା ବେଳେ କେତେକ ସ୍ଥାନରେ ଚାଷୀ ଧାନ କାଟି ବିଲରେ ପକାଇଛନ୍ତି । ବର୍ଷା ଯୋଗୁଁ ଚାଷୀ ଆତଙ୍କିତ ହୋଇପଡିଛନ୍ତି । ବର୍ଷା ଯଦି ଅଧିକ ହୁଏ, ତେବେ ବର୍ଷକର ଆହର ଘରକୁ କିପରି ଆସିବ ସେହି ଚିନ୍ତା ଏବେ ଚାଷୀଙ୍କୁ ଘାରିଛି । ଗତ ବର୍ଷ ମଧ୍ୟ ଧାନ ଅମଳ ସମୟରେ ବର୍ଷାପବନ ଯୋଗୁଁ ଗଞ୍ଜାମ ଜିଲ୍ଲାର ଚାଷୀ ସର୍ବସ୍ଵାନ୍ତ ହୋଇପଡିଥିଲେ ।
