ବଲାଙ୍ଗିର, ବଲାଙ୍ଗିର ସହର ଉପକଣ୍ଠ ସତ୍ୟନାରାୟଣ ପଡ଼ା ନିକଟରେ ଗତକାଲି ରାତିରେ ଏକ ଲୁହା ବୋଝେଇ ଟ୍ରଲରକୁ ମୋଟର ସାଇକେଲ ଧକ୍କା ଦେବା ଫଳରେ ସମ୍ପୃକ୍ତ ବାଇକ୍ ଆରୋହୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି । ମୃତକ ଜଣକ ବରଗଡ଼ ଜିଲ୍ଲା ଡାଙ୍ଗବାହାଲ ଗାଁର କୃଷ୍ଣଚନ୍ଦ୍ର ଭୋଇ ବୋଲି ଜଣାପଡିଛି ।
ଗତକାଲି ରାତିରେ କୃଷ୍ଣଚନ୍ଦ୍ର ମୋଟର ସାଇକେଲ ନେଇ ବଲାଙ୍ଗିରରୁ ବରଗଡ଼ ଜିଲ୍ଲା ଅଭିମୁଖେ ଯାଉଥିଲେ । ସତ୍ୟନାରାୟଣ ପଡ଼ା ନିକଟରେ ବାଇକ୍ ଟି ଭାରସାମ୍ୟ ହରାଇ ଲୁହା ବୋଝେଇ ଟ୍ରଲରକୁ ଧକ୍କା ଦେଇଥିଲା । ଘଟଣାସ୍ଥଳରେ ବାଇକ୍ ଆରୋହୀ କୃଷ୍ଣଚନ୍ଦ୍ରଙ୍କର ମୃତ୍ୟୁ ଘଟିଥିଲା । ଯାହାକୁ ନେଇ ସେଠାରେ ଉତେଜନା ପ୍ରକାଶ ପାଇଥିଲା । ଉତ୍ୟେକ୍ତ ଲୋକେ ସେଠାରେ ଦୀର୍ଘ ସମୟ ଧରି ରାସ୍ତା ଅବରୋଧ କରିଥିଲେ । ସହର ଭିତରେ ଶୀଘ୍ର ବାଇପାସ ରାସ୍ତା ନିର୍ମାଣ ଓ ମୃତକଙ୍କ ପରିବାରକୁ କ୍ଷତିପୂରଣ ଦାବି କରିଥିଲେ । ଫଳରେ ଦୁଇ ଘଂଟା ଧରି ବଲାଙ୍ଗିର-ସମ୍ବଲପୁର ରାସ୍ତାରେ ଯାନବାହନ ଚଳାଚଳ ବ୍ୟାହତ ହୋଇଥିଲା । ପରେ ବଲାଙ୍ଗିର ଟାଉନ ଥାନା ପୋଲିସ ଘଟଣାସ୍ଥଳରେ ପହଂଚି ଉତ୍ୟେକ୍ତ ଲୋକଙ୍କୁ ବୁଝାସୁଝା କରିବା ପରେ ସ୍ଥିତି ନିୟନ୍ତ୍ରଣାଧିନ ହୋଇଥିଲା । ମୃତକଙ୍କ ଶବ ଜବତ କରି ଏହାକୁ ବ୍ୟବଚ୍ଛେଦ ନିମନ୍ତେ ପଠାଇଛି ପୋଲିସ । ଟାଉନ ଥାନା ପୋଲିସ ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜ୍ଜୁ କରି ତଦନ୍ତ ଜାରୀ ରଖିଛି ।
