ଧର୍ମଶାଳା, ଯାଜପୁର ଜିଲା ବୈରୀ ଥାନା ଅନ୍ତର୍ଗତ କାଇମାଟିଆ ଗ୍ରାମରେ ଅଘଟଣ । ଗତକାଲି ବିଳମ୍ବିତ ରାତିରେ ଅଗ୍ନୀକାଣ୍ଡ ଘଟି ୪ ବଖରା ସମେତ ଲକ୍ଷାଧିକ ଟଙ୍କାର ସମ୍ପତି ପୋଡି ପାଉଁଶ ହୋଇଯାଇଥିବା ଜଣାପଡିଛି । କାଇମାଟିଆ ଗ୍ରାମର ବାବନ ସାହୁଙ୍କ ଘର ବୋଲି ଜଣାପଡିଛି । ବିଦ୍ୟୁତ୍ ସର୍ଟ ସର୍କିଟରୁ ଅଗ୍ନୀକାଣ୍ଡ ଘଟିଥିବା ଅନୁମାନ କରାଯାଉଛି ।
ସୂଚନା ମୁତାବକ,ଗତ କାଲି ରାତିରେ ବାବନଙ୍କ ପରିବାର ଲୋକେ ଖାଇପିଇ ଛପର ଘରେ ଶୋଇ ପଡିଥିଲେ । ତେବେ ବିଳମ୍ବିତ ରାତିରେ ଘର ଜଳୁଥିବା ପରିବାର ଲୋକେ ଜାଣିବାକୁ ପାଇ ଥିଲେ । ଚାହୁଁଚାହୁଁ ୪ ବଖରା ଛପର ଘରେ ନିଆଁ ଲାଗି ଯାଇଥିଲା । ନିଆଁର ପ୍ରକୋପ ଏତେ ଥିଲା ଯେ ପରିବାର ଓ ଗ୍ରାମବାସୀଙ୍କ ପକ୍ଷେ ଏହା ସମ୍ଭବ ହୋଇ ନ ଥିଲା । ଶେଷରେ ଚଣ୍ଡିଖୋଲ ଅଗ୍ନୀଶମ ବିଭାଗକୁ ଖବର ଦିଆଯାଇଥିଲା । ଅଗ୍ନୀଶମ ବିଭାଗ କର୍ମଚାରୀ ଘଟଣାସ୍ଥଳରେ ପଂହଚି ନିଆଁକୁ ଆୟତ କରିଥିଲେ । ହେଲେ ସେତବେଳକୁ ୪ ବଖରା ଘର ସମେତ ସମସ୍ତ ଆସବାସପତ୍ର ପୋଡି ପାଉଁଶ ହୋଇ ଯାଇଥିଲା । ବଡଚଣା ବିଜେପିର ବରିଷ୍ଠ ନେତା ଅମର ନାୟକ ଅଗ୍ନୀବିପନ୍ନ ପରିବାରଙ୍କ ନିକଟରେ ପଂହଚି ଶୁଖିଲା ଖାଦ୍ୟ ପ୍ରଦାନ କରିବା ସହିତ ପରିବାରଙ୍କୁ ସମବେଦନା ଜଣାଇଛନ୍ତି । ଅଗ୍ନୀବିପନ୍ନ ପରିବାରଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି ।
