-
ଅଲୋଡା ହୋଇ ପଡିଛି ଦୁଇକୋଟି ଟଙ୍କାର ରାଜସ୍ବ ବିଭାଗ କ୍ବାର୍ଟର୍ସ
ଘସିପୁରା, ରାଜସ୍ବ ବିଭାଗର କର୍ମଚାରୀଙ୍କ ରହିବାପାଇଁ ଦୁଇକୋଟିରୁ ଉର୍ଦ୍ଧ୍ବ ଟଙ୍କା ବ୍ୟୟରେ ଘସିପୁରାରେ ନିର୍ମାଣ ହୋଇଛି ସରକାରୀ କ୍ବାର୍ଟର୍ସ । ହେଲେ ବିଭାଗୀୟ ଅବହେଳା ଯୋଗୁ ବର୍ଷବର୍ଷ ପରେ ମଧ୍ୟ ଏହା କାମରେ ଲାଗି ପାରୁନାହିଁ। ଏହି ସରକାରୀ କ୍ବାର୍ଟର୍ସ ଏବେ ସାମାନ୍ୟ ବିଦ୍ୟୁତ୍ ସଂଯୋଗ ହୋଇପାରିନଥିବାରୁ ବ୍ୟବହାର ଉପଯୋଗୀ ହୋଇନପାରି ଅଲୋଡା ହୋଇପଡିଛି ।
ଘସିପୁରା ଝାଡ଼େଶ୍ବର ମନ୍ଦିର ଯିବା ବାଟରେ ଆନନ୍ଦପୁର ରାସ୍ତା ଓ ଗୃହ ବିଭାଗ ଦ୍ବାରା ଦୁଇଟି ବହୁତଳ ବିଶିଷ୍ଟ ସରକାରୀ କ୍ବାର୍ଟର୍ସ ନିର୍ମାଣ ହୋଇଛି। ଏହାର ପାଚେରୀ ନିର୍ମାଣ ହୋଇଥିବାବେଳେ ଘରରେ ବିଦ୍ୟୁତ୍ ୱାରିଂ, ପାଇପ୍ ୱାରିଂ ମଧ୍ୟ କରାଯାଇଛି। ଏଥିପାଇଁ ଦୁଇ କୋଟିରୁ ଅଧିକ ଟଙ୍କା ବ୍ୟୟ କରାଯାଇଛି। ୨୦୨୦ରୁ ଏହାର ନିର୍ମାଣ ଶେଷ ହୋଇଥିବାବେଳେ ଏହା ହସ୍ତାନ୍ତର ହୋଇ ପାରିନଥିଲା। ଅଳ୍ପ କିଛି ଦିନ ତଳେ ପୁର୍ତ୍ତବିଭାଗ ପକ୍ଷରୁ ସମ୍ମୁଖ ରାସ୍ତା ନିର୍ମାଣ କରାଯାଇ ରାଜସ୍ବ ବିଭାଗକୁ ହସ୍ତାନ୍ତର କରାଯାଇଥିଲା। ଏହାପରେ ବିଦ୍ୟୁତ୍ ସଂଯୋଗ କରାଯିବା ପରେ ରାଜସ୍ବ କର୍ମଚାରୀମାନେ କ୍ବାଟର୍ସରେ ରହିବା କଥା। ବିଦ୍ୟୁତ୍ ବିଭାଗ ପକ୍ଷରୁ ସଂଯୋଗ ପାଇଁ ଏକ ଖୁଣ୍ଟ ପଡିବା ସହିତ ପାଖାପାଖି ୫୦ ହଜାର ଟଙ୍କାର ଅଟକଳ ରାଜସ୍ବ ବିଭାଗକୁ ପ୍ରଦାନ କରାଯାଇଥିଲା। ଏହି ଟଙ୍କା ଜମା ହୋଇନଥିବାରୁ କ୍ବାର୍ଟର୍ସ ବ୍ୟବହାରରେ ଲାଗି ନପାରି ଅଲୋଡା ହୋଇ ପଡିରହିଛି ।
ଏନେଇ ଆନନ୍ଦପୁର ଉପଜିଲ୍ଲାପାଳ ଗୋପିନାଥ କୁଅଁରଙ୍କ ଦୃଷ୍ଟି ଆକର୍ଷଣ କରାଯିବାରୁ ଏହି ଅର୍ଥ ବିଭାଗ ପକ୍ଷରୁ ଦେବା ସମ୍ଭବ ନୁହେଁ। ସରକାରୀ ଅନୁଦାନ ଆସିଲେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ବୋଲି ପ୍ରକାଶ କରିଛନ୍ତି।
