ଯାଜପୁର, ଘର ଆଗରେ ଖେଳୁଥିବା ସମୟରେ ୬ ବର୍ଷର ଶିଶୁପୁତ୍ର ଉପରେ ମାଡ଼ିଗଲା ଇଟା ବୋଝେଇ ମିନି ଟ୍ରକ୍ । ଫଳରେ ତାର ମୃତ୍ୟୁ ଘଟିଛି । ଆଜି ଅପରାହ୍ନରେ ଏଭଳି ଦୁଃଖଦ ଘଟଣା ଘଟିଯାଇଛି ଯାଜପୁର ଜିଲ୍ଲା ବିଂଝାରପୁର ଥାନା ଅନ୍ତର୍ଗତ ଶାସନ୍ଦା ଗାଁରେ । ମୃତ ଶିଶୁର ନାମ ସୁଫିଆନ୍ ଖାନ୍ ।
ଦିନ ପ୍ରାୟ ଗୋଟାଏ ସମୟରେ ଘର ଆଗରେ ସୁଫିଆନ୍ ଖେଳୁଥିବା ସମୟରେ ଏକ ଇଟା ବୋଝେଇ ମିନି ଟ୍ରକ୍ ଆସି ତା’ ଉପରେ ମାଡ଼ି ଯାଇଥିଲା । ପରିବାର ଲୋକେ ଶିଶୁପୁତ୍ରକୁ ଗୁରୁତର ଅବସ୍ଥାରେ ଉଦ୍ଧାର କରି ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରିଥିଲେ । ହେଲେ ସେଠାରେ ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ । ଏହି ଖବର ପ୍ରଚାରିତ ହେବା ପରେ ଶାସନ୍ଦା ଗାଁରେ ଉତେଜନା ପ୍ରକାଶ ପାଇଛି । ଗାଁ ଲୋକେ ଡ୍ରାଇଭରକୁ ଅଟକ ରଖିବା ସହ ବିଂଝାରପୁର ପୁଲିସର ଜିମା ଦେଇଛନ୍ତି । ପୁଲିସ ଟ୍ରକ୍ କୁ ଜବତ କରି ଘଟଣାର ତଦନ୍ତ କରୁଛି ।
