ଭଦ୍ରକ – ଭଦ୍ରକ ଗ୍ରାମାଞ୍ଚଳ ଥାନା ଅଧୀନସ୍ଥ ଗେଲଟୁଆ ପଂଚାୟତର ଦପା ନାୟକାଣୀ ବଙ୍ଗାଳିସାହିରେ ଭୟାବହ ଅଗ୍ନିକାଣ୍ଡ ଘଟି ଜଣେ ବ୍ୟକ୍ତିଙ୍କ ୩ ବଖରା ଗୁହାଳ ପୋଡିଯିବା ସହ ୩ଟି ଗାଈ ଓ ୩ଟି ବାଛୁରୀ ସଂପୂର୍ଣ୍ଣ ଜଳିଯାଇଛନ୍ତି । ପ୍ରାପ୍ତ ଖବରରୁ ଯାହା ଜଣାଯାଏ ଦପାନାୟକାଣୀ ବଙ୍ଗାଳିସାହି ନିବାସୀ ଲାଲ ସିଂଙ୍କ ପରିବାର ଗତକାଲି ଖାଇ-ପିଇ ଶୋଇଯିବା ପରେ ରାତି ପ୍ରାୟ ୨ଟାରେ ବିଦ୍ୟୁତ୍ ସର୍ଟ ସର୍କିଟ୍ ଯୋଗୁଁ ଗୁହାଳଟିରେ ନିଆଁ ଲାଗିଯାଇଥିଲା । ଏହି ଅଗ୍ନିକାଣ୍ଡ ଏଭଳି ଭୟାବହ ଥିଲା ଯେ ସ୍ଥାନୀୟ ଲୋକେ ତାହାକୁ ଆୟତ କରିପାରିନଥିଲେ । ଏହି ଅଗ୍ନିକାଣ୍ଡରେ ୩ ବଖରା ଗୁହାଳ ସଂପୂର୍ଣ୍ଣ ରୂପେ ଭସ୍ମ ହୋଇଯାଇଥିବାବେଳେ ସେଥିରେ ଥିବା ୩ଟି ଗାଈ ଓ ୩ଟି ବାଛୁରୀ ମୃତ୍ୟୁବରଣ କରିଛନ୍ତି । ଖବର ପାଇ ସ୍ଥାନୀୟ ସରପଞ୍ଚ ସରୋଜ ଦାସ ଘଟଣାସ୍ଥଳରେ ପହଂଚି ରାଜସ୍ୱ ନିରୀକ୍ଷକଙ୍କୁ ଡକାଇ ପ୍ରାଥମିକ ତଦନ୍ତ କରାଇଛନ୍ତି । ବିଶେଷକରି ଏହି ପରିବାରଟି ଅତ୍ୟନ୍ତ ଦରିଦ୍ର ହୋଇଥିବାରୁ ତାଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହୋଇଛି ।
