ବାରିପଦା,ମୟୂରଭଞ୍ଜ ଜିଲ୍ଲା ତିରିଙ୍ଗ ଥାନା ଦେଇ ଯାଇଥିବା ୨୨୦ ନଂ ଜାତୀୟ ରାଜପଥର ଡାଳିମା ଛକରେ ଟ୍ରକ୍ ଧକ୍କାରେ ୩ ଜଣଙ୍କ ମୃତ୍ୟୁ ଘଟିଛି । ଯାହାକୁ ନେଇ ସେଠାରେ ଉତେଜନା ପ୍ରକାଶ ପାଇଛି । ଉତ୍ୟେକ୍ତ ଲୋକେ ସେଠାରେ ଦୀର୍ଘ ସମୟ ଧରି ଜାତୀୟ ରାଜପଥ ଅବରୋଧ କରିଛନ୍ତି । ଫଳରେ ସମ୍ପୃକ୍ତ ରୁଟ୍ ରେ ଯାତାୟାତ ଠପ୍ ହୋଇଯାଇଛି । ପୋଲିସ ଘଟଣାସ୍ଥଳରେ ପହଂଚି ସ୍ଥିତି ନିୟନ୍ତ୍ରଣକୁ ଆଣିବାକୁ ଉଦ୍ୟମ ଜାରୀ ରଖିଛି । ସୂଚନା ଅନୁଯାୟୀ, ଟ୍ରକ୍ ଟି ଗତକାଲି ରାତିରେ ଲୁହାପଥର ବୋଝେଇ କରି ଯାଉଥିବା ବେଳେ ଏହି ଦୁର୍ଘଟଣା ଘଟିଥିଲା । ଓଭରଟେକ୍ କରିବାକୁ ଯାଇ ଟ୍ରକ୍ ଟି ଏକ ସ୍କୁଟି ସହିତ ଅନ୍ୟ ଦୁଇ ଜଣଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ଡାଳିମା ଗ୍ରାମର ତରଣୀ ବିହାରୀ ଓ ସିପୁ ବିହାରୀ କକା ପୁତୁରାଙ୍କ ମୃତ୍ୟୁ ଘଟିଥିଲା । ତେବେ ମୃତ ଅନ୍ୟ ଜଣେ ସ୍କୁଟି ଆରୋହୀଙ୍କ ପରିଚୟ ମିଳିପାରିନଥିବା ବେଳେ ତାଙ୍କ ଘର ଝାଡ଼ଖଣ୍ଡରେ ବୋଲି ଜଣାପଡିଛି ।
