ମାଲକାନଗିରି ଜିଲ୍ଲାରେ ନୂଆ ୮୬ କରୋନା ପଜିଟିଭ୍ ଚିହ୍ନଟ

ମାଲକାନଗିରି,  ମାଲକାନଗିରି ଜିଲ୍ଲାରେ ଆଜି ନୂଆ ୮୬ ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ରିପୋର୍ଟ ପଜିଟିଭ୍ ଆସିବା ପରେ ଗୁରୁତରଙ୍କୁ କୋଭଡ୍ ହସ୍ପିଟାଲ ଓ ସାମାନ୍ୟ ଆକ୍ରାନ୍ତଙ୍କୁ ହୋମ୍ ଆଇସୋଲେସନରେ ରଖାଯାଇ ସେମାନଙ୍କ ସ୍ୱାସ୍ଥ୍ୟ ପ୍ରତି ଦୃଷ୍ଟି ଦିଆଯାଉଛି । ଏହାକୁ ମିଶାଇ ଜିଲ୍ଲାରେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୫୮୨୫ କୁ ବୃଦ୍ଧି ପାଇଛି । ଏଥି ମଧ୍ୟରୁ ୫୩୯୭ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ବର୍ତମାନ ଜିଲ୍ଲାରେ ସକ୍ରିୟ ମାମଲା ୪୦୩ ରହିଛି । ସେହିପରି ଅଦ୍ୟାବଧି ଜିଲ୍ଲାରେ କରୋନାଜନିତ ମୃତ୍ୟୁ ସଂଖ୍ୟା ୨୫ ରହିଛି ।

ନୂଆ ଚିହ୍ନଟ ଏହି ଆକ୍ରାନ୍ତ ମାନଙ୍କ ମଧ୍ୟରେ ରହିଛନ୍ତି ମାଲକାନଗିରି ପୌରାଚଂଳରୁ ୧୪ ଜଣ, ମାଲକାନଗିରି ବ୍ଲକରୁ ୮ ଜଣ, କୋରକୋଣ୍ଡା ବ୍ଲକରୁ ୩ ଜଣ, ମାଥିଲି ବ୍ଲକରୁ ୨୬ ଜଣ, କାଲିମେଳା ବ୍ଲକରୁ ୧୪ ଜଣ, ଖଇରପୁଟ ବ୍ଲକରୁ ୧୫ ଜଣ, ଚିତ୍ରକୋଣ୍ଡା ବ୍ଲକରୁ ଜଣେ ଓ ପଡ଼ିଆ ବ୍ଲକରୁ ୫ ଜଣ ଆକ୍ରାନ୍ତ ରହିଛନ୍ତି । ଏହି ଆକ୍ରାନ୍ତ ମାନଙ୍କ ମଧ୍ୟରେ ଦୁଇ ଜଣ କରୋନା ଯୋଦ୍ଧା ରହିଛନ୍ତି । ନୂଆ ଚିହ୍ନଟ ଏହି ଆକ୍ରାନ୍ତ ମାନଙ୍କ ମଧ୍ୟରୁ ଜଣେ ପୂର୍ବ ଆକ୍ରାନ୍ତଙ୍କ ସଂସ୍ପର୍ଶରେ ଆସି ସଂକ୍ରମିତ ହୋଇଥିବା ବେଳେ ୮୫ ଜଣ କ୍ଲିନିକାଲ୍ ରେଫର୍ ପରେ ପଜେଟିଭ୍ ଚିହ୍ନଟ ହୋଇଛନ୍ତି । ଦିନକୁ ଦିନ କୋଭିଡ଼୍ ହସ୍ପିଟାଲରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାରୁ ମେଡ଼ିକାଲରେ କାର୍ଯ୍ୟରତ ଡ଼ାକ୍ତର ଷ୍ଟାଫ୍ ନର୍ସ ଓ ଅନ୍ୟାନ୍ୟ କର୍ମଚାରୀଙ୍କ ସୁରକ୍ଷା ଦୃଷ୍ଟିରୁ ଆଜି ଜିଲ୍ଲା ପ୍ରଶାସନ ପକ୍ଷରୁ ସ୍ଥାନୀୟ ଦମକଳ କେନ୍ଦ୍ରର କର୍ମଚାରୀ ମାନେ ମେଡ଼ିକାଲ ଭିତର ଓ ବାହାରକୁ ସାନିଟାଇଜ୍ କରିଛନ୍ତି ।