ବାରିପଦା – ମୟୂରଭଞ୍ଜ ଜିଲ୍ଲା କରଞ୍ଜିଆ ଥାନା ଅନ୍ତର୍ଗତ ପାଟଳୁଡିହି ଗ୍ରାମରେ ଜଣେ ବିଧବା ମହିଳାଙ୍କୁ ଅତ୍ୟନ୍ତ ବିଭତ୍ସ ଭାବେ ହତ୍ୟା କରାଯାଇଛି । ମହିଳାଙ୍କ କଟାମୁଣ୍ଡ ଗ୍ରାମ ନିକଟସ୍ଥ କ୍ଷେତରୁ ଉଦ୍ଧାର କରାଯାଇଥିବା ବେଳେ ମୁଣ୍ଡ ବିହୀନ ଶରୀର ନିଜ ଘର ନିକଟରୁ ଉଦ୍ଧାର ହୋଇଛି । ମୃତ ମହିଳାଙ୍କ ନାମ ଜିରାମଣି ସଇ (୫୭) ।
ଆଜି ସକାଳେ ଗ୍ରାମର କେତେକ ଲୋକେ ନଦୀକୁ ଗାଧୋଇବାକୁ ଯାଇଥିବା ବେଳେ ସେମାନେ ନଦୀ ଘାଟ ନିକଟସ୍ଥ କ୍ଷେତରେ ମହିଳାଙ୍କ କଟାମୁଣ୍ଡ ଦେଖି ପୋଲିସକୁ ଖବର ଦେଇଥିଲେ । ପୋଲିସ ପହଂଚି ଖୋଜାଖୋଜି କରିବାରୁ ନଦୀ ଠାରୁ ୫୦୦ ମିଟର ଦୂର ନିଜ ଘର ନିକଟରୁ ତାଙ୍କ ମୁଣ୍ଡ ବିହୀନ ଶବ ଉଦ୍ଧାର କରାଯାଇଥିଲା । ପରେ ଏହାକୁ ବ୍ୟବଚ୍ଛେଦ ନିମନ୍ତେ ପଠାଯାଇଛି । ତେବେ ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଛି । ସମ୍ପୃକ୍ତ ମହିଳାଙ୍କ ସ୍ୱାମୀ ତିନି ମାସ ତଳେ ପ୍ରାଣ ହରାଇଥିଲେ । ତାଙ୍କର କୌଣସି ପିଲା ଛୁଆ ନଥିଲେ । ମହିଳା ଜଣକ ଦିନ ମଜୁରିଆ ଭାବେ କାର୍ଯ୍ୟ କରିବା ସହ ରଶି ବିକ୍ରୀ କରି ନିଜ ଗୁଜୁରାଣ ମେଂଟାଉଥିଲେ । ହେଲେ, କିଏ ଓ କାହିଁକି ତାଙ୍କୁ ଏଭଳି ଅମାନୁଷିକ ଭାବେ ହତ୍ୟା କରିଛି ତାହା ତଦନ୍ତ ପରେ ସ୍ପଷ୍ଟ ହେବ ବୋଲି ପୋଲିସ କହିଛି । ଅନ୍ୟପକ୍ଷରେ ସମ୍ପୃକ୍ତ ମହିଳାଙ୍କୁ ଡ଼ାହାଣୀ ସନ୍ଦେହରେ ହତ୍ୟା କରାଯାଇଥିବା ଅନୁମାନ କରାଯାଉଛି ।
