ବୁଧବାର ପୌଷ କୃଷ୍ଣ ଅଷ୍ଟମୀ ତିଥିରେ ଶ୍ରୀମନ୍ଦିରରେ ଶ୍ରୀବିଗ୍ରହ – ମାନଙ୍କ ‘ବନକ ଲାଗି’ ବା ‘ଶ୍ରୀମୁଖ ସିଂହାର ନୀତି ଅନୁଷ୍ଠିତ ହୋଇଅଛି । ଏହି ନୀତି ପାଳିଆ ଖୁଣ୍ଟିଆ, ଗରାବଡୁ,ପାଳିଆ -ପୁଷ୍ପାଳକ-୩, ଚାଙ୍ଗଡ଼ା ମେକାପ, ମୁଦୁଲି, ଦତ୍ତ ମହାପାତ୍ର-୩ ଓ ପୂଜାପଣ୍ଡା ସେବକ ମାନେ ଉପସ୍ଥିତ ରହି ଉକ୍ତ ନୀତି ସମ୍ପାଦନ କରିଥିଲେ । ଆଜି ମହାପ୍ରଭୁଙ୍କ ଶ୍ରୀମନ୍ଦିର ଦ୍ୱାର ଫିଟା ନୀତି ପ୍ରତଃ ଘ.୪.୨୦ରେ ସମ୍ପନ୍ନ ପରେ, ଭିତର ଶୋଧ,ମଙ୍ଗଳ ଆଳତି ପରେ, ପରବର୍ତ୍ତୀ ଦୈନଦିନ ନୀତି ବଢି ମହାପ୍ରଭୁଙ୍କ ମଧ୍ୟାନ ଧୂପ ଘ.୧.୩୦ ରେ ଶେଷ ହୋଇ,ଦଖିଣି ଘର ଭୋଗ ଘ.୨.୦୦ ବଢିଥିଲା, ଏହାପରେ ମହାପ୍ରଭୁଙ୍କ ୨ୟ – ଭୋଗମଣ୍ଡପ ଘ.୨.୩୫ ରେ ଶେଷ ହୋଇ, ପ୍ରସାଦ ବାହାରି ପାଣି ପଡିଥିଲା |ମହାପ୍ରଭୁଙ୍କ ମଇଲମ, ତଡପ ଲାଗି, ଦିବାପହୁଡ଼ ଆଳତି ନୀତି ସମ୍ପନ୍ନ ପାଇଁ, ପାଳିଆ ଖୁଣ୍ଟିଆ, ଦଖିଣ ଦ୍ୱାର ଲଣ୍ଡା ବର୍ତ୍ତ ‘ ଠାରେ ଅପେକ୍ଷାରେ ଥିବା ୩ଜଣ ପାଳିଆ ପୁଷ୍ପାଳକ ଙ୍କୁ ଡାକି ଥିଲେ |ପାଳିଆ ପୁଷ୍ପାଳକେ ଗରାବଡୁଙ୍କ ଠାରୁ ହାତୁଆଣି ନେଇ (ହାତଧୋଇ) ସିଂହାସନ ଉପରକୁ ଉଠିଥିଲେ, ପାଳିଆ ପୁଷ୍ପାଳକ ମାନେ ମହାପ୍ରଭୁଙ୍କ ମଇଲମ ଘ.୨.୫୦ ,ତଡପ ଲାଗି ଘ.୩.୦୫ ଏବଂ ଦିବା ପହୁଡ଼ ଆଳତି ଘ.୩.୧୦ ରେ ଶେଷ କରି ସିଂହାସନରୁ ଓଲ୍ଲାହି ଆସିଥିଲେ । ଏହାପରେ ମହାପ୍ରଭୁ ଙ୍କ ବନକ ଲାଗି ପାଇଁ ବିଧିମତେ ପାଳିଆ ପଢ଼ିଆରୀ , ଜୟବିଜୟ ଦ୍ୱାର ବନ୍ଦ କରିଥିଲେ । ଏହାପରେ ୩ଜଣ ପାଳିଆ ଦତ୍ତ ମହାପାତ୍ର ଘ.୩.୧୫ ମି. ରେ ବନକ ପେଡାଟେ ବନକ ଧରି ବେହରଣ ଦ୍ୱାର ଦେଇ ଭିତରକୁ ଆସି ସିଂହାସନକୁ ଉଠିଥିଲେ । ଗରାବଡୁ ସେବକଙ୍କ ଠାରୁ ହାତୁଆଣି ନେଇ ଶ୍ରୀବିଗ୍ରହମାନଙ୍କ ଶ୍ରୀମୁଖ ସିଂହାର ଆରମ୍ଭ କରିଥିଲେ |ଏଥି ପୂର୍ବରୁ ମୁଦୁଲିଙ୍କ ଠାରୁ ଆବଶ୍ୟକ ତିନୋଟି ରୁପା ପିଙ୍ଗଣରେ କର୍ପୁର ଜଳ ଓ ଚାଙ୍ଗଡ଼ା ମେକାପଙ୍କ ଠାରୁ ତିନି ଖଣ୍ଡ ଶ୍ରୀକାପଡା ନେଇଥିଲେ| ମଝିବାଡରେ ବନକଲାଗି ସମୟରେ ପାଳିଆ ମେକାପ ଅଖଣ୍ଡଙ୍କ ଠାରୁ ବ ଇ ଠା ନେଇ ଦେଖାଇଥିଲେ | ମହାପ୍ରଭୁଙ୍କ ଶ୍ରୀମୁଖ ସିଂହାର ସାରି ପାଳିଆ ଦତ୍ତ ମହାପାତ୍ରେ ସନ୍ଧ୍ୟା ଘ.୬.୦୦ ରେ ସିଂହାସନରୁ ଓଲାହି ଆସିଥିଲେ । ଶ୍ରୀବିଗ୍ରହମାନଙ୍କ ଏହି ବନକଲାଗି ବା ଶ୍ରୀମୁଖ ସିଂହାର ସାରିବାକୁ ପାଳିଆ ଦତ୍ତ ମହାପାତ୍ର ମାନଙ୍କୁ ତିନି ଘଣ୍ଟା ସମୟ ଲାଗିଥିଲା |ବନକଲାଗି ବଢ଼ିଲାପରେ ପାଳିଆ ମେକାପ ସିଂହାସନ ଉପରକୁ ଉଠି ସିଂହାସନ ଧୋଇଥିଲେ |ଏହାପରେ ତିନି ପୂଜାପଣ୍ଡା ସାମନ୍ତେ ସିଂହାସନ ତଳେ ବସି ପଂଚାମୁର୍ତ୍ତରେ ମହାସ୍ନାନ କରିଥିଲେ | ତତ୍ପରେ ମହାସ୍ନାନ ପୂଜାଠା ହୋଇ, ମହାସ୍ନାନ ପୂଜା ଶେଷ ପରେ,ଗଭା ମଇଲମ ହୋଇ,ସନ୍ଧ୍ୟା ଆଳତି ବେଶ ହୋଇଥିଲେ | ଏହାପରେ ମହାପ୍ରଭୁଙ୍କ ସନ୍ଧ୍ୟା ଆଳତି ହୋଇ, ସନ୍ଧ୍ୟା ଧୂପ, ସନ୍ଧ୍ୟା ଧୂପ ପ୍ରସାଦ ବାହାରି ପାଣି ପଡିବାପରେ, ମହାପ୍ରଭୁଙ୍କ ମଇଲମ ହୋଇ, ଚନ୍ଦନଲାଗି ପରେ,ବଡ଼ସିଂହାର ବେଶ,ବଡ଼ସିଂହାର ଭୋଗ ପରେ ଟୋପର ଲାଗି ହୋଇ ମହାପ୍ରଭୁଙ୍କ ରାତ୍ର ପହୁଡ଼ ଅନୁଷ୍ଟିତ ହେବ |
Related Stories
September 28, 2024
September 28, 2024