ଶିକୁଳିରେ ବନ୍ଧା ଦୁଇ ଭାଇଙ୍କ ଜୀବନ : ଚିକିତ୍ସାରେ ଅର୍ଥ ସାଜିଛି ବାଧକ 

ମାଲକାନଗିରି– ମାଲକାନଗିରି ଜିଲ୍ଲା ଅନ୍ତର୍ଗତ ମାଥିଲି ବ୍ଲକର ବଲଦିଆଗୁଡାରେ ବାସ କରୁଛନ୍ତି କୃଷ୍ଣ ଦାସ । କୃଷ୍ଣ ଦାସଙ୍କର ଏକ ସୁଖୀ ପରିବାର ଥିଲା । ଦୁଇ ପୁଅ ଏବଂ ଗୋଟିଏ ଝିଅ ସହ କୃଷ୍ଣ ସୁଖରେ ଦିନ କାଟୁଥିଲେ । ବ୍ଲକର ଜଳ ଓ ପରିମଳ ବିଭାଗରେ ଏସିଏମ ଭାବେ କାମ କରି ଯାହା ରୋଜଗାର କରୁଥିଲେ ସେତିକିରେ ପରିବାର ଚଳୁଥିଲା । ପତ୍ନୀଙ୍କର ଅକାଳ ବିୟୋଗ ପରେ କୃଷ୍ଣ ଭାଙ୍ଗି ପଡିଲେ । ତିନି ପିଲାଙ୍କୁ ନେଇ ସେ ବହୁ କଷ୍ଟରେ ଜୀବନ ଅତିବାହିତ କଲେ । ପେଟ ପାଇଁ ଦାନା ସଂଗ୍ରହ କରିବା ସଙ୍ଗେ ସଙ୍ଗେ ତିନି ପିଲାଙ୍କୁ ମଣିଷ କରିବା ପାଇଁ ଅହରହ ପରିଶ୍ରମ କଲେ । ପିଲାମାନେ ମଧ୍ୟ ମଣିଷ ହେଲେ । ପୁଅ ରାଜେଶ ଏବଂ ପ୍ରକାଶ ଦୁହେଁ ପିଲାଟି ଦିନରୁ ହିଁ ଭଲ ପାଠ ପଢି ପ୍ରଥମ ସ୍ଥାନ ଅଧିକାର କରୁଥିଲେ । ଏପରିକି ଦୁହେଁ ମ୍ୟାଟ୍ରିକରେ ପ୍ରଥମ ସ୍ଥାନ ଅଧିକାର କରି ଯୁକ୍ତ ଦୁଇରେ ନାମ ଲେଖାଇଥିଲେ । ତେବେ ଅଚାନକ ଏକ କଳା ବାଦଲ କୃଷ୍ଣଙ୍କ ପରିବା ଉପରେ ଘେରି ଯାଇଥିଲା । ଦୁଇ ପୁଅ ରାଜେଶ ଓ ପ୍ରକାଶ ମାନସିକ ଅଗ୍ରସର ହୋଇଯାଇଥିଲେ । ଦୁହେଁ ଯାହାକୁ ଦେଖିଲେ ବାଡେଇଲେ । ବାପାଙ୍କ କଥା ଶୁଣିଲେ ନାହିଁ କି ନିଜର ସଂପର୍କୀୟଙ୍କ କଥା ମଧ୍ୟ ମାନିଲେ ନାହଁ । ଦୁହେଁ ଏବେ ବି ଭଲ କଥାବାର୍ତ୍ତା କରନ୍ତି । କିନ୍ତୁ, ବେଳେ ବେଳେ ମାନସିକ ଅନଗ୍ରସର ଲୋକେ ଯେଭଳି ବ୍ୟବହାର କରନ୍ତି ସେଭଳି କରିଥାନ୍ତି । ବାପା କୃଷ୍ଣ ଦୁହିଁଙ୍କୁ ମେଡିକାଲ ନେଇ ଚିକିତ୍ସା ମଧ୍ୟ କରାଇଥିଲେ। କିନ୍ତୁ, କୌଣସି ସୁଫଳ ମିଳିଲା ନାହିଁ । ଗୋଟିଏ ଦିଗରେ ପିଲାଙ୍କୁ ବଡ କରିବା ପାଇଁ ଦାନା ଯୋଗାଡ କରିବେ ନା ଏମାନଙ୍କ ଚିକିତ୍ସା ପାଇଁ ଟଙ୍କା ଯୋଗାଡ କରିବେ । ଦୁହିଁଙ୍କୁ ଏବେ ପ୍ରାୟ ତିରିଶି ବର୍ଷ ଡେଇଁଲାଣି । ଦୁହେଁ ଘରେ ପଡି ରହିଛନ୍ତି । ରାଜେଶକୁ ବାଧ୍ୟ ହୋଇ ବାପା ଶିକୁଳିରେ ବାନ୍ଧିଛନ୍ତି । ଯେପରି କୌଣସି ଲୋକଙ୍କୁ ରାଜେଶ ଆଘାତ ନପହଞ୍ଚାଏ ସେଥିପାଇଁ ଏଭଳି କରାଯାଇଥିବା କୁହାଯାଇଛି । ପାଖରେ ଅର୍ଥ ନଥିବାରୁ ଦୁହିଁଙ୍କୁ ବଡ ଡାକ୍ତରଖାନା ନେଇ ଚିକିତ୍ସା କରାଇପାରୁନାହାନ୍ତି । ଭଉଣୀ କିନ୍ତୁ ଠିକ ଥିବା ଜଣାପଡିଛି । ସେ ଏଏନଏମ ଭାବେ ଚାକିରି କରୁଥିବା ଜଣାପଡିଛି । ଦୁଇ ପୁଅଙ୍କ ଅବସ୍ଥା ଏଭଳି ହୋଇଯାଇଥିବାରୁ ବାପାଙ୍କ ଦୁଃଖ କହିଲେ ନସରେ । ଦୁଇ ପିଲାଙ୍କୁ ନେଇ ଯାହା ସ୍ବପ୍ନ ଦେଖିଥିଲେ ସବୁ ଚୁରମାର୍ ହୋଇଗଲା । ଦୁଇ ବିଜ୍ଞ ପିଲା କିଭଳି ହଠାତ୍ ଏଭଳି ମାନସିକ ଅନଗ୍ରସର ହୋଇଗଲେ ସେ ବୁଝିପାରୁନାହାନ୍ତି । ବଲଦିଆଗୁଡା ଗ୍ରାମ ସମେତ ଆଖପାଖ ଗ୍ରାମର ଲୋକ ଏହି ଦୁଇ ପିଲାଙ୍କ ବିଷୟରେ କହିଲା ବେଳେ ଆହା ବୋଲି ପାଟିରୁ ବାହାରି ପଡୁଥିବା ଦେଖିବାକୁ ମିଳିଥିଲା । ରାଜେଶ ଏବଂ ପ୍ରକାଶଙ୍କର ବିଚକ୍ଷଣ ବୁଦ୍ଧି କାହାକୁ ଅଛପା ନାହିଁ । ସମସ୍ତେ ଦୁଇ ପିଲାଙ୍କୁ ନେଇ ଗର୍ବିତ ବୋଲି କହୁଥିଲେ ମଧ୍ୟ ମାନସିକ ଅନଗ୍ରସର ହେବା ପରେ ଦୁହେଁ କାହାରି କଥା ଶୁଣୁ ନଥିବା କହିଥିଲେ । ଯଦି ବାପା କୃଷ୍ଣଙ୍କର କିଛି ହୋଇଯାଏ ତେବେ ଦୁଇ ପୁଅଙ୍କ ଅବସ୍ଥା କ’ଣ ହେବ ବୋଲି ସେ ଚିନ୍ତାରେ ପଡିଛନ୍ତି । ସରକାରଙ୍କ ତରଫରୁ କିମ୍ବା କୌଣସି ବଦାନ୍ୟ ବ୍ୟକ୍ତି ସହଯୋଗର ହାତ ବଢାଇଲେ ହୁଏତ ଦୁଇ ପିଲା ପୁଣି ହସିବେ ବୋଲି କୃଷ୍ଣ ଦାସ ଏବଂ ସ୍ଥାନୀୟ ଅଞ୍ଚଳବାସୀ ଅନୁରୋଧ କରିଛନ୍ତି।