ଖବର ଅନୁଯାୟୀ, ଆଜି ପୂର୍ବାହ୍ନ ପ୍ରାୟ ୧୦ଟା ସମୟରେ ବରୋଗୋଡା ସମିଲ ଛକ ରାସ୍ତା କଡ଼ରେ ବିକ୍ରି ହେଉଥିବା ଦହିବରା ଖାଇବା ପାଇଁ ଅଟୋରିକ୍ସା ଯୋଗେ ଅଟୋ ମେକାନିକ୍ ଦଶରଥ ସାହୁ (ମେଣା) ଯାଇଥିଲେ । ସେଠାରେ ଦହିବରା ଖାଇବା ପାଇଁ ଅଟକି ଥିବା ସମୟରେ ଘଟଗାଁରୁ ହରିଚନ୍ଦନପୁର ଅଭିମୁଖେ ଆସୁଥିବା ଏକ ହାଇଓ୍ବା ତାଙ୍କ ଅଟୋରିକ୍ସାକୁ ଧକ୍କା ଦେଇଥିଲା । ଫଳରେ ଅଟୋ ମଧ୍ୟରେ ଥିବା ଦଶରଥ ସାହୁ ଆହତ ହୋଇଥିବା ବେଳେ ଅଟୋଟି ଭାଙ୍ଗିରୁଜି ଚୁରମାର୍ ହୋଇଯାଇଛି । ଘଟଣା ପରେ ହାଇଓ୍ବା ଚାଳକ ଜଣକ ଦୃତ ଗତିରେ ଘଟଣାସ୍ଥଳରୁ ଗାଡି ନେଇ ହରିଚନ୍ଦନପୁର ବଜାର ଦେଇ ବ୍ରାହ୍ମଣୀପାଳ ରାସ୍ତାରେ ପଳାଇଯିବାକୁ ଚେଷ୍ଟା କରିଥିଲେ । ହେଲେ କେତେ ଜଣ ଯୁବକ ବାଇକ୍ ଯୋଗେ ସମ୍ପୃକ୍ତ ହାଇଓ୍ବା ପଛରେ ଯାଇ ତାଳଡିହି ଛକ ନିକଟରେ ଅଟକାଇ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉକ୍ତ ହାଇଓ୍ବାକୁ ଜବତ କରି ଥାନାକୁ ଆଣିଥିବା ସହ ଡ଼୍ରାଇଭରଙ୍କୁ ଅଟକ ରଖିଥିବା ଜଣାପଡ଼ିଛି । ଉକ୍ତ ଅଟୋରିକ୍ସାଟି ହରିଚନ୍ଦନପୁର ବ୍ଲକ ସୁନାପେଣ୍ଠ ଗ୍ରାମର ଜିତେନ୍ଦ୍ର ପଲେଇଙ୍କର ବୋଲି ଜଣାପଡ଼ିଛି । ସେ ଅଟୋଟିକୁ ମରାମତି ନିମନ୍ତେ ହରିଚନ୍ଦନପୁର ଠାରେ ଦେଇଥିବା ଜଣାପଡିଛି । ଏଥିସହ ଉକ୍ତ ଅଟୋରିକ୍ସା ପାଖରେ ଛିଡ଼ା ହୋଇଥିବା ଏକ ବାଇକ୍ ଭାଙ୍ଗିଯାଇଥିବା ସହ ଜଣେ ଆହତ ହୋଇଥିବା ଜଣାପଡିଛି । ଉଭୟ ଆହତଙ୍କୁ ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
