ପଟ୍ଟାମୁଣ୍ଡାଇ– କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ଶ୍ରୀରାମପୁର ପଚାଂୟତ ପାଳପାଟଣା ଗ୍ରାମରେ ପରକିୟା ପ୍ରୀତିକୁ ନେଇ ତୁମୁଳକାଣ୍ଡ ଘଟିଯାଇଛି । ଏହି ଗ୍ରାମର ଜନୈକା ମହିଳାଙ୍କ ସ୍ୱାମୀ ବିଦେଶରେ ଚାକିରୀ କରୁଥିବାରୁ ମହିଳା ଜଣକ ଶାଶୁଘରେ ଏକାକୀ ରହୁଥିଲେ । ଏହି ସୁଯୋଗରେ ସେହି ଗ୍ରାମର ଜନୈକ ଯୁବକ ଉକ୍ତ ମହିଳାଙ୍କ ସହିତ ପ୍ରେମ ସଂପର୍କ ସ୍ଥାପନ କରି ତାଙ୍କ ଘରକୁ ଯିବାଆସିବା କରୁଥିଲେ । ଯାହାଫଳରେ ସଂପୃକ୍ତ ଯୁବକ ଓ ବିବାହିତା ମହିଳା ଜଣକ ପରକ୍ରିୟା ପ୍ରିତୀରେ ମାତି ଯାଇଥିଲେ । ଏହି ଘଟଣା ଗ୍ରାମର ଯୁବକ ଓ ଲୋକମାନଙ୍କ ଦୃଷ୍ଟିକୁ ଆସିବା ପରେ ଉଭୟଙ୍କୁ ପାନେ ଦେବା ପାଇଁ ଗ୍ରାମର ଲୋକମାନେ ସ୍ଥିର କରିଥିଲେ । ଗତ ବୁଧବାର ସଂନ୍ଧ୍ୟାରେ ସଂପୃକ୍ତ ଯୁବକ ଉକ୍ତ ମହିଳାଙ୍କ ଘରକୁ ପ୍ରବେଶ କରିବା ପରେ ପୂର୍ବରୁ ପ୍ରସ୍ତୁତ ଗ୍ରାମର ଯୁବକମାନେ ଘର ବାହାର ପଟୁ ତାଲା ପକାଇ ଦେଇଥିଲେ । ଗୁରୁବାର ସକାଳେ ଗ୍ରାମର ଲୋକମାନେ ଯୁବକ ଓ ବିବାହିତା ମହିଳା ଉଭୟଙ୍କୁ ଘର ବାହାରକୁ ଆଣି ବାନ୍ଧି ପକାଇବା ସହିତ ନିର୍ଦ୍ଧୁମ ଛେଚିଥିଲେ । ଖବର ପାଇ ପଟ୍ଟାମୁଣ୍ଡାଇ ପୋଲିସ ଉତ୍ୟକ୍ତ ଲୋକଙ୍କ କବଳରୁ ଉଭୟଙ୍କୁ ଉଦ୍ଧାର କରି ଥାନାକୁ ଆଣିବା ସହିତ ଘଟଣାର ଛାନଭିନ ଆରମ୍ଭ କରିଛି । ଏହି ଘଟଣା ଶ୍ରୀରାମପୁର ସମେତ ସମଗ୍ର ପଟ୍ଟାମୁଣ୍ଡାଇ ଅଂଚଳରେ ଚର୍ଚ୍ଚାର ବିଷୟ ହୋଇଛି ।
