ସ୍ଵଛ ଭାରତ ମିଶନ ପାଳନ ଅବସରରେ ପ୍ରଭାତଫେରୀ, ବୃକ୍ଷ ରୋପଣ ଏବଂ ଶ୍ରମଦାନ
ଭୁବନେଶ୍ୱର -ଜାତିର ଜନକ ମହାତ୍ମା ଗାନ୍ଧୀଙ୍କ ୧୫୦ତମ ଜନ୍ମ ଦିବସ ପାଳନ ଅବସରରେ ପୂର୍ବତଟ ରେଳପଥ ଏହାର ମହାପ୍ରବନ୍ଧକ ଶ୍ରୀ ବିଦ୍ୟା ଭୂଷଣ ଙ୍କ ନେତୃତ୍ୱରେ ରେଳପଥର ଅଧିକାରୀ ଓ କର୍ମଚାରୀମାନେ ସ୍ଵଛ ଭାରତ ମିଶନ ପାଇଁ ବିଭିନ୍ନ କାର୍ଯ୍ୟକ୍ରମ ଆୟୋଜନ କରିଥିଲେ I ଏହି ଅବସରରେ ଶ୍ରୀ ବିଦ୍ୟା ଭୂଷଣ ରେଳବାଇ କର୍ମଚାରୀ ମାନଙ୍କୁ ନିଜେ ଏକକ ବ୍ୟବହୃତ ପ୍ଲାଷ୍ଟିକ ବ୍ୟବହାର ନକରିବା ସହ ଅନ୍ୟ ମାନଙ୍କୁ ଏହାର ବ୍ୟବହାରକୁ ବାରଣ କରିବାକୁ ଶପଥପାଠ କରାଇଥିଲେ I ଏହା ସହିତ ସ୍ୱଚ୍ଛତା ପ୍ରତି ସପ୍ତାହକୁ ୨ ଘଣ୍ଟା ଶ୍ରମଦାନ କରିବାକୁ ମଧ୍ୟ ଶପଥ କରାଇଥିଲେ I
ଏହି ଅବସରରେ ରେଳପଥର ଅତିରିକ୍ତ ମହାପ୍ରବନ୍ଧକ ଶ୍ରୀ ସୁଧୀର କୁମାରଙ୍କ ସହିତ ସମସ୍ତ ବିଭାଗୀୟ ପ୍ରମୁଖ ଅଧିକାରୀମାନେ ଉପସ୍ଥିତ ଥିଲେ I ରେଳପଥର ଅଧିକାରୀ ଓ କର୍ମଚାରୀମାନେ ଏହି ଅବସରରେ ରେଳବିହାର ଠାରେ ସ୍ୱଚ୍ଛତା ପାଇଁ ଶ୍ରମଦାନ କରିବା ସହିତ ବୃକ୍ଷରୋପଣ କରିଥିଲେ I ଏହା ପୂର୍ବରୁ ରେଳପଥର ଅଧିକାରୀ ଓ କର୍ମଚାରୀମାନଙ୍କ ସହିତ ଭାରତ ସ୍କାଉଟ ଓ ଗାଇଡ୍ସ ସ୍ବେଚ୍ଛାସେବୀମାନେ ପ୍ରଭାତଫେରୀ କାର୍ଯ୍ୟକ୍ରମ ରେ ସ୍ୱଚ୍ଛତା ସମ୍ବନ୍ଧରେ ବିଭିନ୍ନ ସ୍ଲୋଗାନ ମାଧ୍ୟମରେ ଜନସାଧାରଣଙ୍କୁ ସଚେତନତାର ବାର୍ତ୍ତା ପହଞ୍ଚାଇବା ସହିତ ଏକକ ବ୍ୟବହୃତ ପ୍ଲାଷ୍ଟିକ ବ୍ୟବହାର ନକରିବାକୁ କହିଥିଲେ I
