ଲଗାଣ ବର୍ଷାରେ ଭାଙ୍ଗିଲା ଶିବ ମନ୍ଦିର  

ସ୍ଥାନୀୟ ଲୋକଙ୍କ ସୂଚନା ମୁତାବକ, ଗତକାଲି ରାତ୍ରି ପ୍ରାୟ ୨ ଟା ବେଳେ ଶିବ ମନ୍ଦିରର ଛାତ ଭୁଶୁଡି ପଡିଥିଲା । ଶିବ ମନ୍ଦିର ଭୁଶୁଡିବା ପରେ ସ୍ଥାନୀୟ ଶୈବ ଭକ୍ତଙ୍କ ମଧ୍ୟରେ ଉତ୍ତେଜନା ଦେଖାଦେବା ସହ ପ୍ରଶାସନ ପକ୍ଷରୁ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।

ସୂଚନା ମୁତାବକ, ଉପର ମୁଣ୍ଡରେ ଲଗାଣ ବର୍ଷା ଜାରି ରହିଥିବାରୁ ଗିରିକାନପାଲ୍ଲୀ ପଞ୍ଚାୟତର ପେଦାଗୁଡା, ପ୍ରେମାଗୁଡା, ଜାଲିଗୁଡା ଆଦି ଗ୍ରାମ ଗୁଡିକ ଜଳ ଘେର ମଧ୍ୟକୁ ଚାଲି ଯାଇଥିବା ବେଳେ ନଦୀ ପାଣି ଶିମିଳିବାଞ୍ଛା ପଞ୍ଚାୟତର ଏମପିଭି-୬୯ ଗ୍ରାମ ନଦୀ ନିକଟବର୍ତ୍ତୀ ହୋଇଥିବାରୁ ଗ୍ରାମବାସୀଙ୍କ ମଧ୍ୟରେ ଛନକା ପଶିଲାଣି । ପଡିଆ କୃଷି କାର୍ଯ୍ୟାଳୟ ଅନ୍ତର୍ଗତ ୧୦ ଟି ପଞ୍ଚାୟତରେ ଶହ ଶହ ଏକର ଚାଷ ଜମିରେ ନଦୀ ପାଣି ଜମି ରହିବାରୁ ଫସଲ ନଷ୍ଟ ହୋଇଥିବା ବେଳେ ଶିମିଳିବାଞ୍ଛା, ଗିରିକାନପଲ୍ଲୀ, କାଲଦାପଲ୍ଲୀ ଓ ଭୁବନପଲ୍ଲୀ ଅଞ୍ଚଳର ଅନେକ ଚାଷୀ ଏ ନେଇ ଅଭିଯୋଗ କରିଥିବା ପଡିଆ କୃଷି ଅଧିକାରୀ ରଶ୍ମିରଞ୍ଜନ ମହାରଣା କହିଛନ୍ତି । ଆଗାମୀ କିଛି ଘଣ୍ଟା ବର୍ଷା ହେଲେ ଗିରିକାନପଲ୍ଲୀ ଓ ଶିମିଳିବାଞ୍ଛା ପଞ୍ଚାୟତର ପ୍ରାୟ ୬ ଗ୍ରାମ ଜଳମଗ୍ନ ହେବାକୁ ଥିବାରୁ ପ୍ରଶାସନ ପକ୍ଷରୁ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯିବା ଆବଶ୍ୟକ ବୋଲି ସାଧାରଣରେ ମତ ପ୍ରକାଶ ପାଇଛି ।