କନ୍ଧମାଳ– କନ୍ଧମାଳ ଜିଲ୍ଲା ଖଜୁରିପଡ଼ା ଥାନା ଅନ୍ତର୍ଗତ ସମ୍ବରଡେଗା ଠାରେ ବାଇକ୍ ଦୁର୍ଘଟଣାରେ ଫୁଲବାଣୀ ନ୍ୟୁଜ୍ -୭ ର କ୍ୟାମେରାମ୍ୟାନ ରାଜୁ ନାୟକ (୨୩)ଙ୍କ ମୃତ୍ୟୁ ଘଟିଛି ।
ତାଙ୍କ ଘର ଫୁଲବାଣୀର ନବିଖଣ୍ଡି ସାହିରେ । ସେ ତାଙ୍କ ଭଉଣୀଙ୍କୁ ଖଜୁରିପଡ଼ାସ୍ଥିତ ତାଙ୍କ ଶାଶୁଘରେ ଛାଡି ଆଜି ଅପରାହ୍ନ ପ୍ରାୟ ସାଢ଼େ ଗୋଟାଏ ସମୟରେ ଫୁଲବାଣୀ ଫେରୁଥିବା ବେଳେ ସମ୍ବରଡେଗା ନିକଟରେ ଭାରସାମ୍ୟ ହରାଇ ରାସ୍ତା ପାଶ୍ୱର୍ରେ ଥିବା ଏକ ଗଛରେ ଧକ୍କା ଦେଇଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି । ଖବର ପାଇ ଖଜୁରିପଡ଼ା ଥାନା ପୋଲିସ ଘଟଣାସ୍ଥଳରେ ପହଂଚି ମୃତକଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ ଫୁଲବାଣୀ ମେଡିକାଲକୁ ପଠାଇଛି । ଦୁର୍ଘଟଣାଗ୍ରସ୍ତ ବାଇକ୍ କୁ ଜବତ କରିଛି । ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜ୍ଜୁ କରି ତଦନ୍ତ ଚଳାଇଛି ।
ରାଜୁ ନାୟକ ଜଣେ ମେଳାପୀ ଓ ଶାନ୍ତ ସ୍ୱଭାବର ବ୍ୟକ୍ତି ଥିଲେ । ସେ ପ୍ରାୟ ୪ ବର୍ଷ ହେଲା ନ୍ୟୁଜ୍-୭ ରେ କ୍ୟାମେରାମ୍ୟାନ ଭାବେ କାର୍ଯ୍ୟରତ ଥିଲେ । ତାଙ୍କ ମୃତ୍ୟୁ ସାମ୍ବାଦିକ ଓ କ୍ୟାମେରାମ୍ୟାନ ମାନଙ୍କ ମଧ୍ୟରେ ଏବଂ ଆଖପାଖ ଅଂଚଳରେ ଶୋକର ଛାୟା ଖେଳିଯାଇଛି ।
