ମା ସମଲେଶ୍ୱରୀଙ୍କୁ ନବାନ୍ନ ଲାଗି : ନୂଆ ଖାଇଲେ ପଶ୍ଚିମ ଓଡ଼ିଶା ବାସୀ

ସମ୍ବଲପୁର/ଭୁବନେଶ୍ୱର – ପଶ୍ଚିମ ଓଡିଶାର ଗଣପର୍ବ ନୂଆଁଖାଇକୁ  ଖୁବ ଧୁମଧାମରେ ପାଳନ କରାଯାଉଛି । ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ ସମ୍ବଲପୁରର ଅଧିଷ୍ଠାତ୍ରୀ ଦେବୀ  ମା\’ ସମଲେଶ୍ୱରୀଙ୍କ ନିକଟରେ ସକାଳ ୧୦ଟା ୫ ମିନିଟ ସମୟରେ ନବାନ୍ନ ଲାଗି କରାଯାଇଥିଲା । ଏହି ପର୍ବ ପାଳନ ପାଇଁ ରାଜ୍ୟ ତଥା ରାଜ୍ୟ ବାହାରେ ତଥା ବିଦେଶରେ ରହୁଥିବା ପଶ୍ଚିମ ଓଡିଶାବାସୀ ଘରକୁ ଫେରିଛନ୍ତି । ନବାନ୍ନ ଲାଗି ପରେ ସମସ୍ତେ ନୂଆ ବସ୍ତ୍ର ପରିଧାନ କରିବା ସହ ଏକାଠି ବସି ନୂଆ ଖାଇବାର ପରମ୍ପରା ରହିଛି ।

ମଙ୍ଗଳବାର  ଭୋର ୪ଟା ବେଳୁ ମନ୍ଦିରର ପୂଜକମାନେ ନିଜ ଘରୁ ନବାନ୍ନ ନେଇ ଆସିଥିଲେ । ପ୍ରଥମେ ମା\’ ସମଲେଶ୍ୱରୀଙ୍କ ପାଖରେ ସେହି ନବାନ୍ନ ଅର୍ପଣ କରାଯାଇଥିଲା । ଏହାପରେ ସେଠାରେ ଥିବା ପାର୍ଶ୍ୱ ଦେବାଦେବୀଙ୍କୁ ତାହା ଲାଗି କରାଯାଇଥିଲା । ଏହାପରେ ମହାଆଳତୀ ହୋଇଥିଲା ।  ତାପରେ ସର୍ବସାଧାରଣଙ୍କ ଦର୍ଶନଲାଗି ମନ୍ଦିର ଖୋଲିଥିଲା ।

ଅପରପକ୍ଷରେ ନୂଆଁଖାଇ ପାଳନ ପାଇଁ ପୁରା ପଶ୍ଚିମ ଓଡିଶା ଉତ୍ସବ ମୁଖର ହୋଇ ଉଠିଛି । ସମ୍ବଲପୁର , କଳାହାଣ୍ଡି , ବଲାଙ୍ଗୀର , ବରଗଡ  ଆଦି  ଜିଲ୍ଲାରେ ଆନନ୍ଦ ଉତ୍ସାହର ସହ ଏହି ପର୍ବ ପାଳନ କରାଯାଉଛି । ପରିବାରର ସମସ୍ତେ ପିଲା ଠାରୁ ବୁଢା ଏକତ୍ର ବସି ନୂଆ ଖାଇବା ପରେ ନିଜ ଠାରୁ ବଡ ମାନଙ୍କ ପାଦ ଛୁଇଁ ଆଶୀର୍ବାଦ ନେଇଛନ୍ତି ।