ଝାରସୁଗୁଡ଼ା– ଝାରସୁଗୁଡ଼ା ଜିଲ୍ଲା ବାଗଡ଼ିହି ରେଞ୍ଜ୍ ଅନ୍ତର୍ଗତ ଭଅଁରା ଗ୍ରାମରେ ଘରେ ପଶି ଖାଦ୍ୟ ଶସ୍ୟ ଖାଇବା ଆଶାରେ ଦୁଇଟି ବଣୁଆ ହାତୀ ଗତକାଲି ରାତି ପ୍ରାୟ ସାଢ଼େ ୩ଟା ସମୟରେ ଗ୍ରାମର ୬୫ ବର୍ଷିୟା ବିଧବା ମହିଳା ଯମୁନା ବେହେରାଙ୍କ ଘରେ ପଶିବାକୁ ଉଦ୍ୟମ କରିଥିଲେ । ହାତୀ ଦୁଇଟି ଘରର ମାଟି କାନ୍ଥ ଭାଙ୍ଗି ଦେଇଥିଲେ । ଫଳରେ କାନ୍ଥ ଭୁଶୁଡ଼ି ପଡ଼ିବାରୁ ଏହା ତଳେ ଚାପି ହୋଇ ଘରେ ଶୋଇଥିବା ଅବସ୍ଥାରେ ସମ୍ପୃକ୍ତ ମହିଳାଙ୍କ ମୃତ୍ୟୁ ଘଟିଛି । ଘଟଣାସ୍ଥଳରୁ ହାତୀ ଦୁଇଟି ଚାଲିଯିବା ପରେ ଗ୍ରାମବାସୀ ମହିଳାଙ୍କ ମୃତଦେହ ଉଦ୍ଧାର କରିବା ସହ ଏ ସମ୍ପର୍କରେ ବାଗଡ଼ିହି ଫାଣ୍ଡି ପୋଲିସ ଓ ବାଗଡ଼ିହି ଫରେଷ୍ଟ ରେଞ୍ଜ୍ କୁ ଖବର ଦେଇଥିଲେ । ଖବର ପାଇ ବନ ବିଭାଗ କର୍ମଚାରୀ ମାନେ ଘଟଣାସ୍ଥଳରେ ପହଂଚି ମୃତ ମହିଳାଙ୍କ ଶବ ଜବତ କରିଛନ୍ତି । ଏହାକୁ ବ୍ୟବଚ୍ଛେଦ ନିମନ୍ତେ ଝାରସୁଗୁଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି । ବିଭାଗ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।
ଏହି ହାତୀ ଦୁଇଟି ସ୍ଥାନୀୟ ଅଂଚଳରେ ଗତ କିଛି ଦିନ ହେଲା ବ୍ୟାପକ କ୍ଷୟକ୍ଷତି ଘଟାଇ ଚାଲିଥିବା ସୂଚନା ମିଳିଛି ।
