ଭୁବନେଶ୍ୱର – ଭୁବନେଶ୍ୱରରେ ଭିଜିଲାନ୍ସ ଡିଏସପିଙ୍କ ଠାରୁ ଲୁଟେରାମାନେ ବନ୍ଧୁକ ମୁନରେ ସୁନା ଅଳଙ୍କାର ଲୁଟି ନେଇଛନ୍ତି । ଲୁଟେରାମାନେ ଡିଏସପି ଏବଂ ତାଙ୍କ ପରିବାର ସଦସ୍ୟଙ୍କୁ ବନ୍ଧୁକ ଦେଖାଇ ଧମକ ଦେଇଥିଲେ ଏବଂ ତାଙ୍କଠାରୁ ସୁନା ଚେନ୍, ସୁନା କାନଫୁଲ ଏବଂ ଚୁଡ଼ି ଛଡ଼ାଇ ନେଇଥିଲେ । ଏହି ଘଟଣା ସମ୍ପୃକ୍ତ ଅଂଚଳରେ ଚାଂଚଲ୍ୟ ସୃଷ୍ଟି କରିଛି ।
ମିଳିଥିବା ସୂଚନା ଅନୁଯାୟୀ, ରବିବାର ସକାଳେ ଭିଜିଲାନ୍ସ ଡିଏସପି ତନୁଜା ମହାନ୍ତି ଭୁବନେଶ୍ୱର ୟୁନିଟ୍ -୩ ଅଂଚଳରେ ଥିବା ତାଙ୍କ ସରକାରୀ ବାସଭବନ ସମ୍ମୁଖରେ ଠିଆ ହୋଇଥିବା ବେଳେ ଦୁଇଜଣ ବାଇକ୍ ଚାଳକ ସୁନା ଅଳଙ୍କାର ଲୁଟ୍ କରିଥିଲେ । ଲୁଟେରାମାନେ ତନୁଜାଙ୍କ ବେକରୁ ସୁନା ଚେନ୍ ଛଡ଼ାଇବାକୁ ଚେଷ୍ଟା କରୁଥିବା ବେଳେ ସେ ଚିତ୍କାର କରିଥିଲେ । ଚିତ୍କାର ଶୁଣିବା ମାତ୍ରେ ତାଙ୍କ ସ୍ୱାମୀ ଘରୁ ବାହାରି ଆସିଥିଲେ । ସେ ଲୁଟେରାମାନଙ୍କ ନିକଟକୁ ଯିବା ବେଳେ ସେମାନଙ୍କ ମଧ୍ୟରୁ ଜଣେ ବନ୍ଧୁକଧାରୀ ତାଙ୍କୁ ଏବଂ ତାଙ୍କ ପତ୍ନୀଙ୍କୁ ମାରି ଦେବାକୁ ଧମକ ଦେଇଥିଲା । ସେମାନଙ୍କ ଠାରୁ ପିନ୍ଧିଥିବା ସୁନା ଚେନ୍ ଏବଂ ଅନ୍ୟାନ୍ୟ ଅଳଙ୍କାର ଲୁଟିବା ପରେ ଲୁଟେରାମାନେ ଘଟଣାସ୍ଥଳରୁ ଫେରାର୍ ହୋଇ ଯାଇଥିଲେ ବୋଲି ତନୁଜା ମହାନ୍ତିଙ୍କ ସ୍ୱାମୀ କହିଛନ୍ତି ।
