ବାରିପଦା – ହାତୀ ଆକ୍ରମଣରେ ଜଣେ ବ୍ୟକ୍ତିର ମୃତ୍ୟୁ ହୋଇଛି । ଏପରି ଦୁଃଖଦ ଘଟଣା ଘଟିଛି ମୟୁରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଅନ୍ତର୍ଗତ ଯାଉରିପୋଷି ଗ୍ରାମରେ । ଜୁଲାଇ ୨୪ ସନ୍ଧ୍ୟା ସମୟରେ ହାତୀ ଦେଖିବାକୁ ଯାଇ କେଉଁଝରା ଗ୍ରାମର ଖଗେଶ୍ବର ମହାନ୍ତ ହାତୀ ହାବୁଡ଼ରେ ପଡିଯିବାରୁ ହାତୀ ଖଗେଶ୍ବର ମହାନ୍ତଙ୍କୁ ପାଦରେ ଦଳି ଦେଇଥିଲା । ଘଟଣାସ୍ଥଳରେ ଖଗେଶ୍ବର ମହାନ୍ତ ଗୁରୁତ୍ତର ଭାବେ ଆହତ ହୋଇ ତଳେ ପଡି ଛଟପଟ ହେଉଥିବା ଅବସ୍ଥାରେ ବନବିଭାଗ କର୍ମଚାରୀ ଉଦ୍ଧାର କରି ଚିକିତ୍ସା ନିମନ୍ତେ କରଞ୍ଜିଆ ଉପଖଣ୍ଡ ଚିକିତ୍ସାଲୟରେ ଭର୍ତ୍ତି କରାଇଥିଲେ ; ମାତ୍ର ଡାକ୍ତର ତାଙ୍କୁ ମୃତ ଘଷଣା କରିଥିଲେ । ଏହାକୁ ନେଇ ଗ୍ରାମରେ ଶୋକର ଛାୟା ଖେଳିଯାଇଛି । ତେବେ ଗତ କିଛି ଦିନ ହେବ ୧୭ଟି ହାତୀ ଥିବା ଏକ ପଲ କରଞ୍ଜିଆ ବନଖଣ୍ଡ ଅଞ୍ଚଳରେ ବ୍ୟାପକ ଫସଲ ନଷ୍ଟ ସହ ୨୦ରୁ ଅଧିକ ଘର ଭାଙ୍ଗି ଦେବା ଘଟଣାକୁ ନେଇ ବନବିଭାଗର ନିଦ ହଜି ଯାଇଛି । ହାତୀ ପଲକୁ ଘଉଡାଇବା ପାଇଁ ବନ ବିଭାଗ ନକେଦାମ ହୋଇପଡିଥିବା ବେଳେ ପଲ ଫସଲ କ୍ଷେତ ଛାଡି ଯିବାକୁ ପ୍ରସ୍ତୁତ ନ ଥିବାର ପରିଲକ୍ଷିତ ହୋଇଛି ।
