ବ୍ରହ୍ମପୁର : ଗଞ୍ଜାମ ଜିଲ୍ଲା ପାଟପୁର ଥାନାରେ ଜଣେ ଅଭିଯୁକ୍ତ ଆତ୍ମହତ୍ୟା ଉଦ୍ୟମ କରିଥିବା ଜଣାପଡିଛି । ଏକ ହତ୍ୟା ମାମଲାରେ ସମ୍ପୃକ୍ତ ଥିବା ଅଭିଯୁକ୍ତକୁ ପୋଲିସ ତଦନ୍ତ ପାଇଁ ଆଣିଥିବା ବେଳେ ଶୁକ୍ରବାର ସକାଳୁ ଶୌଚାଳୟକୁ ଯାଇ ଫିନାଇଲ୍ ପିଇ ଆତ୍ମହତ୍ୟା ଉଦ୍ୟମ କରିଛି । ଜଣେ କନେଷ୍ଟବଳ ତାଙ୍କୁ ଜଗିଥିଲେ । ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ଆଡପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପୋଲିସ ନେଇ ଭର୍ତ୍ତି କରିଥିବା ବେଳେ ଅବସ୍ଥା ସଙ୍କଟାପନ୍ନ ହେବାରୁ ବ୍ରହ୍ମପୁର ବଡ ମେଡିକାଲ୍କୁ ପଠାଇ ଦିଆଯାଇଛି । ଘଟଣାରୁ ପ୍ରକାଶ ଯେ, ଗତ ୨୩.୫.୨୦୨୦ରେ ବ୍ରହ୍ମପୁର ଶାସ୍ତ୍ରୀନଗର ବିଭୁ ପ୍ରସାଦ ଦାଶକୁ ଗଞ୍ଜେଇ ବେପାରକୁ ନେଇ ପଇସା ନେଣଦେଣ ଯୋଗୁ ଶ୍ରୀରାମ ନଗର ଜଙ୍ଗଲରେ ହାତ ଗୌଡ ବାନ୍ଧି ମାରିଦେବା ଘଟଣାରେ ବିଭୂର ଦାଦା ଗତ ୨୫.୫.୨୦୨୦ରେ ପାଟପୁର ଥାନାରେ ଏତଲା ଦେଇଥିଲେ । ଏତଲା ପ୍ରକାରେ ପାଟପୁର ପୋଲିସ ତଦନ୍ତ କରି ଗତ ୨୭.୫.୨୦୨୦ରେ ଶ୍ରୀରାମନଗର ଜଙ୍ଗଲରୁ ମୃତଦେହ ଉଦ୍ଧାର କରିଥିଲା । ଏହି ଘଟଣାରେ ଗତ ୮.୬.୨୦୨୦ରେ ୨ଜଣ ଅଭିଯୁକ୍ତ ଅଡବା ଥାନା ନାଡାମା ଗ୍ରାମର କୋମଳଲୋଚନ ଗମାଙ୍ଗ ଏବଂ ପାଟପୁର ଥାନା କାଳିବୋରେଇ ଗ୍ରାମର ଟୁକୁନା ଶବରଙ୍କୁ କୋର୍ଟଚାଲାଣ କରାଯାଇଥିଲା । ଏହି ଘଟଣାରେ ଅନ୍ୟ ଅଭିଯୁକ୍ତ ଥିବା ବେଳେ କବିସୂର୍ଯ୍ୟନଗରରୁ ପ୍ରମୋଦ କୁମାର ଦଳାଇକୁ ପାଟପୁର ଥାନା ଅଧିକାରୀ ଅଜୟ କୁମାର ବାରିକ ଶୁକ୍ରବାର ଭୋରରୁ ଉଠାଇ ଆଣିଥିଲା । ଅଭିଯୁକ୍ତ ପ୍ରମୋଦ ଦଳାଇକୁ କୋର୍ଟଚାଲାଣ କରିବା ପୂର୍ବରୁ ଭୟଭୀତ ହୋଇ ଶୌଚାଳୟରେ ଫିନାଇଲ ପିଇ ଆତ୍ମହତ୍ୟା ଉଦ୍ୟମ କରିଥିବା ପାଟପୁର ଥାନାଧିକାରୀ ସୂଚନା ଦେଇଛନ୍ତି ।
