ଭଦ୍ରକ – ଆଜି ଗ୍ରାମାଂଚଳ ଥାନା ଅଧୀନସ୍ଥ ୧୬ନଂ ଜାତୀୟ ରାଜପଥ ଚରମ୍ପା ନିକଟ ହୁଣ୍ଡାଇ ସୋରୁମ୍ ସମ୍ମୁଖରେ ଘଟିଛି ଏକ ମର୍ମନ୍ତୁଦ ସଡକ ଦୁର୍ଘଟଣା । ଏହି ଦୁର୍ଘଟଣାରେ କାର୍ରେ ବସିଥିବା ୩ ଜଣ ବ୍ୟକ୍ତି ଗୁରୁତର ହୋଇ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର ହୋଇଛନ୍ତି । ପ୍ରାପ୍ତ ଖବରରୁ ଯାହା ଜଣାଯାଏ ପ୍ରତିଷ୍ଠିତ ‘ମିଲ୍କୁ ମୁ’ କ୍ଷୀର କଂପାନୀର ଓଡି-୩୩ଏନ୍-୫୫୩୪ ନମ୍ବରର ଏକ ମହିନ୍ଦ୍ରା ଟବ୍ ଗାଡିରେ ଡ୍ରାଇଭର ସମେତ ଚାରିଜଣ ଅଧିକାରୀ ବାଲେଶ୍ୱରରୁ ଭୁବନେଶ୍ୱର ଅଭିମୁଖେ ଆସୁଥିଲେ । ୧୬ନଂ ଜାତୀୟ ରାଜପଥ ଚରମ୍ପାର ହୁଣ୍ଡାଇ ସୋରୁମ୍ ସମ୍ମୁଖରେ ସମାନ ଅଭିମୁଖେ ଯାଉଥିବା ଏକ ଲୋଡର ଗାଡିକୁ ମହିନ୍ଦ୍ରାଟି ଭାରସାମ୍ୟ ହରାଇ ଧକ୍କା ଦେଇଥିଲା । ଫଳରେ ମହିନ୍ଦ୍ରା ଗାଡିରେ ବସିଥିବା ୩ ଜଣ ମିଲ୍କ ମୁଁ ଅଧିକାରୀ ଗୁରୁତର ହୋଇଥିବାବେଳେ ଚାଳକ ସାମାନ୍ୟ ଆହତ ହୋଇଛି । ଘଟଣାସ୍ଥଳରେ ଗ୍ରାମାଂଚଳ ପୁଲିସ୍ ପହଂଚି ଗୁରୁତରମାନଙ୍କୁ ଭଦ୍ରକ ଡାକ୍ତରଖାନାରେ ଭର୍ତି କରିବା ସହ ଘଟଣାର ଅନୁସନ୍ଧାନ କରୁଛି ।
