ବ୍ରହ୍ମପୁର: ଗୁରୁବାର ବୈଦ୍ୟନାଥପୁର ଥାନା ଅନ୍ତର୍ଗତ ଇଞ୍ଜିନିୟରିଂ ସ୍କୁଲ ନିକଟ ବିଦ୍ୟୁତ୍ପୁର କଲୋନୀରେ ବିଜେଡି ନେତ୍ରୀ ଜ୍ୟୋସ୍ନା ପାଢ଼ୀଙ୍କ ପୁଅ ଅଶୋକ ପାଢ଼ୀଙ୍କ ଉପରେ ଆକ୍ରମଣ ହୋଇଥିବା ନେଇ ବୈଦ୍ୟନାଥପୁର ଥାନାରେ ଅଭିଯୋଗ ହୋଇଛି । ଅଶୋକଙ୍କ ମୁଣ୍ଡ ଫାଟିଛି । ଆକ୍ରମଣ କରିଥିବା ଯୁବକକୁ ବୈଦ୍ୟନାଥପୁର ପୋଲିସ ଅଟକ ରଖି ପଚରା ଉଚୁରା କରୁଥିବା ଥାନାଧିକାରୀ ସାରଦାପ୍ରସନ୍ନ ଦାସ ସୂଚନା ଦେଇଛନ୍ତି । ସୂଚନା ପ୍ରକାରେ, ଗୁରୁବାର ପୂର୍ବାହ୍ନରେ ଆଙ୍କୁଲିର ଅଶୋକ ବିଦ୍ୟୁତ୍ପୁର କଲୋନୀସ୍ଥିତ ସାଉଥ୍କୋ ଅଫିସ୍ରେ ଚାକିରି କରୁଥିବା ଯୋଗୁ ଅଫିସ୍କୁ ଆସୁଥିଲେ । ସେହି ସମୟରେ ରାସ୍ତାରେ ଜଣେ ସାଇକେଲ୍ ଚାଳକ ଛିଡା ହୋଇଥିବା ବେଳେ ତାଙ୍କୁ ରାସ୍ତାରୁ ହଟାଇବା ପାଇଁ ଅଶୋକ କହିଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ସାଇକେଲ୍ ଚାଳକ ଉତ୍ତକ୍ଷୀପ୍ତ ହୋଇ ତାଙ୍କୁ ଠେଲାପେଲା କରି ଆକ୍ରମଣ କରିଥିଲେ । ଆକ୍ରମଣରେ ଅଶୋକ ଆହତ ହୋଇଥିବା ବେଳେ ତାଙ୍କୁ ଚିକିତ୍ସା ପାଇଁ ବଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେପଟେ ଆକ୍ରମଣକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ତାଙ୍କ ମା’ ଶ୍ରୀମତୀ ପାଢ଼ୀ ଦାବି କରିଛନ୍ତି ।
